सांसदले उठाए भूमिगत पानी अनियन्त्रित दोहनको विषय : 'प्रयोगअनुसार मूल्य तय हुनुपर्ने'

सांसदले उठाए भूमिगत पानी अनियन्त्रित दोहनको विषय : 'प्रयोगअनुसार मूल्य तय हुनुपर्ने'

'जसले जति पानी ताने पनि २० हजार रुपैयाँ मात्रै तिरिरहेका छन्, यस्तोमा जसले जति पानी प्रयोग गर्छ सोहीअनुसार मूल्य तय हुनुपर्छ।'

काठमाडौं- काठमाडौं उपत्यकाको भूमिगत पानीको अनियन्त्रित दोहनको विषय संसदमा प्रवेश गरेको छ। जसले जति नै भूमिगत पानी निकाल्दा पनि बराबर शुल्क ठीक नभएको र प्रयोगका आधारमा शुल्क निर्धारण हुनुपर्ने राष्ट्रिय स्वतन्त्र पार्टीका उपसभापति तथा सांसद डोलप्रसाद अर्यालले बताए।

प्रतिनिधि सभाको बिहीबार बसेको बैठकको शून्य समयमा बोल्दै सांसद अर्यालले भने, 'काठमाडौं उपत्यकामा अहिले दैनिक १३ करोड लिटर भूमिगत पानी तानिरहेको अवस्था रहेको छ। जसले जति पानी ताने पनि २० हजार रुपैयाँ मात्रै तिरिरहेका छन्, यस्तोमा जसले जति पानी प्रयोग गर्छ सोहीअनुसार मूल्य तय हुनुपर्छ।'

उपत्यकामा बोरिङ तथा ट्युबेवयलबाट पानी तान्दा वार्षिक २० हजार रुपैयाँ मात्रै शुल्क लिइँदै आएको छ। नेपाल रेडक्रस सोसाइटीले दैनिक ६ हजार लिटर पानी तान्दा वर्षमा २१ लाख ९० हजार लिटर भूमिगत पानी तान्छ। यसवापत उसले काठमाडौं उपत्यका खानेपानी व्यवस्थापन बोर्डलाई वार्षिक २० हजार रुपैयाँ तिर्छ। तर दैनिक एउटा ट्यूबवेलबाट वर्ष दिनमा ४ करोड ३८ लाख लिटर भूमिगत पानी तान्ने बोटलर्स नेपाललाई पनि २० हजार रुपैयाँमात्रै लिने गरेको छ।

भूमिगत पानीको अनियन्त्रित दोहन भइरहेको र शुल्क निर्धारण वैज्ञानिक तथा व्यावहारिक रुपमा समेत ठीक नभएको विषयमा बिजनेस न्युजले निरन्तर समाचारहरू प्रकाशित गर्दै आइरहेको छ।