सांसद पद्मा अर्यालले भनिन् - बीवाईडी गाडी प्रकरणमा शंकामात्र होइन, त्यहाँ घोटाला भएको छ

बिजनेस न्युज

सोमबार, जेठ २५ २०८३

सांसद पद्मा अर्यालले भनिन् - बीवाईडी गाडी प्रकरणमा शंकामात्र होइन, त्यहाँ घोटाला भएको छ

'यो गम्भीर विषय हो। बीवाईडी गाडीको प्रकरणमा शंका मात्र होइन स्पष्ट संकेत देखिएको छ। त्यहाँ घोटाला भएको छ। हामी ठोकेर भन्न सक्छौँ' संसदमा प्रश्न गर्दै उनले भनिन्।

काठमाडौं- नेकपा एमालेकी सचिव तथा सांसद पद्मा अर्यालले रातारात करछली गरेर राज्यलाई ठग्ने र आर्थिक अपराध गरिएको विषयमा सरकारले जवाफ दिनुपर्ने बताएकी छिन्।

बजेटअघि करको सूचना चुहिएर कागजातकै भरमा बीवाईडीका सयौँ गाडी पास भएको विषयमा उनले प्रश्न गर्दै भनिन्, 'चीनबाट आउने बीवाईडी गाडीको घोटाला सडकभर छताछुल्ल भएको छ। भन्सारलाई सेटिङ मिलाएर, कागज मिलाएर गाडी नआउँदै रातारात घोटालाको खेल भएको छ।'

अर्थमन्त्री डा. स्वर्णिम वाग्लेले संसद्मा प्रस्तुत गरेको आर्थिक विधेयकमा पृष्ठ तथा करका दरसम्बन्धी विवरणमा हेरफेर भएको आशंका व्यक्त गर्दै उनले यसबारे तत्काल छानबिन गर्न माग गरिन्।

'आर्थिक विधेयकमा भएको हेरफेर र करका दररेटमा भएको फेरबदल आज बजारमा छताछुल्ल भएको छ। संसदमा पेस गर्दा एउटा अंक राख्ने र मन्त्रालयमा पुगेर अर्को अंक राख्ने, कुन उद्देश्यले यस्ता काम गरिन्छ? रातारात करछली गरेर राज्यलाई ठग्ने, आर्थिक अपराध गरिएको छ' उनले भनिन्।

करका दर हेरफेर हुन लागेको विषय बजेटअघि नै चुहावट हुनु सामान्य विषय नभएको भन्दै संसदबाटै समिति गठन गरेर छानबिन हुनुपर्ने माग संसदमा उठेको छ।

बैठकमा प्रमुख प्रतिपक्षी दल नेपाली कांग्रेससहित विपक्षी दलका सांसदहरु सन्तोष सुब्बा, हर्कराज साम्पाङ राई, ज्ञानेन्द्र शाही, वर्षमान पुनलगायतले करका दर फेरबदल गरिएको, भन्सारलाई मिलाएर चीनबाट गाडी आयातमा अनियमितता भएको विषय सञ्चारमाध्यमबाट सार्वजनिक भएको विषयप्रति छानबिन गरी दोषीलाई कारबाही गरिनुपर्नेमा जोड दिएका छन्।

संसदमा प्रश्न - सीमित व्यक्तिलाई मात्र थाहा हुने करका विषयमा सूचना लिक भएर गाडी भित्रिए, यो चुहावट कसले गर्‍यो?