काठमाडौं- नेपाल ट्रष्टको काठमाडौं प्लाजा भवन भाडामा लिन नसक्ने आशयसहितको पत्र काठमाडौं महानगरपालिकाले पठाएको छ।
काठमाडौं प्लाजाको भवन आफूहरूलाई तत्कालको अवस्थामा आवश्यक नरहेको जानकारी गराउँदै महानगरपालिकाले केही दिनअघि पत्र पठाएको नेपाल ट्रष्टको कार्यालयका प्रवक्ता विष्णुराज ढकालले बताए।
‘भवनमा आवश्यक मात्रामा पार्किङ छैन र महानगरपालिकालाई तत्कालको अवस्थामा भवन चाहिँदैन भनेर पत्र आएको छ,’ ढकालले भने, ‘महानगरको पत्रमा अझै पनि भवन लिने वा नलिने स्पष्ट जवाफ नआएका कारण लिने वा नलिने उत्तर मागेर पत्र पठाउने तयारी भएको छ।’
भवन २०७८ बैशाखदेखि खाली छ। भवनमा अवैध व्यापार गरेकाहरूलाई कार्यालयले बल प्रयोग गरेर निकालेको थियो।
कार्यालयले मासिक ६० हजार ५० लाख रुपैयाँमा काठमाडौं महानगरपालिकालाई भवन भाडामा दिने निर्णयसँगै भवन खाली गरेको थियो।
तर महानगरपालिकाले लामो समयदेखि भवन भाडामा लिने निर्णय गर्दै दुईपक्षीय सम्झौता गरेको थिएन।
नेपाल ट्रष्टको कार्यालयले भवन भाडामा लिने वा नलिने विषयमा स्पष्ट जवाफ माग्दै महानगरपालिकालाई पत्राचार गरिरहेको थियो। अन्तत: महानगरपालिकाले भवन भाडामा नलिने आशयसहितको पत्र पठाएको हो। योसँगै १६ महिना वापतको भाडा रकम मात्रै ९ करोड ६८ लाख रुपैयाँ गुम्ने भएको छ।
भवन खाली गराउने प्रक्रिया २०७७ असारदेखि सुरु भएको थियो। २०५० असार ३ गतेदेखि कन्सेप्ट डेभलपर्सले भवन भाडामा लिएको थियो। नेपाल ट्रष्टको नाममा जग्गा आएसँगै २०६६ पुस २३ गते पुनः लिज सम्झौता नवीकरण गर्दै २०६७ असार ३ गतेदेखि २०७२ असार ३ गतेसम्मको वार्षिक भाडा ६१ लाख र यसपछि सम्झौता अवधि रहने समय २०७७ असार ३ गतेसम्मको वार्षिक भाडा ७५ लाख तोकिएको थियो। उक्त सम्झौता अवधि असार २ गतेबाट सकिएको थियो।
