काठमाडौं- धादिङको धुनिबेसीमा दुई अर्ब रुपैयाँ लगानीमा इनर्जी ड्रिङक्स उद्योग खुल्ने भएको छ। विभिन्न किसिमका पेय पदार्थ उत्पादन गर्ने गरि सरस बेभरेज प्रालि उद्योग विभागमा दर्ता भएको हो। 

तत्कालिन अर्थमन्त्री युवराव खतिवडाले इनर्जी ड्रिङक्सको आयातमा कडाइ गरेका थिए। त्यसको केही समयपछि उद्योग मन्त्रालयले त्यस्ता पेय पदार्थको आयातमा प्रतिबन्ध लगाएको थियो। 

क्याफिनयुक्त शक्तिवर्द्धक पेय पदार्थ (इनर्जी ड्रिङक्स), फ्लेभर्ड सेन्थेटिक ड्रिङक्स र यस्तै प्रकारको पेय पदार्थको आयातमा पूर्ण प्रतिबन्ध लगाएपछि नेपालमै यस्ता उद्योग खुल्ने प्रक्रियामा छन्।  

सरस बेभरेज प्राली वार्षिक १० हजार केएल फ्रुटी, २० हजार केएल सफ्ट ड्रिङक्स र ३० हजार केएल इनर्जी ड्रिङक्स (अलकोहल रहित) उत्पादन गर्ने जनाएको छ। सो उद्योगमा लगानी २ अर्ब रुपैयाँ लगानी गरि ठूला उद्योगको रुपमा दर्ता भएको हो। 

सरस बेभरेजले स्थापना गर्ने उद्योगमा १ सय ८० जनालाई रोजगारी दिइने छ। यो उद्योगमा शतप्रतिशत स्वदेशी लगानी हुनेछ। 

भन्सार बिन्दुमा आइपुग्दा कम्तीमा ७५ प्रतिशत उपभोग्य मिति बाँकी भएको इनर्जी ड्रिङक्समा मात्र आयात गर्न पाइने व्यवस्था गरिएको छ। यो व्यवास्था अन्य खाद्य वस्तुनमा पनि लागु हुनेछ। औषधिको हकमा भने औषधि व्यवस्था विभागको सिफारिसअनुसार हुने व्यवस्था गरिएको थियो।