काठमाडौं- अर्थ मन्त्रालयमा चार जना सहसचिव भित्रिएका छन्। संघीय मामिला तथा सामान्य प्रशासन मन्त्रालयका अनुसार सहसचिवहरू भूपाल बराल, शोभाकान्त पौडेल, केदारनाथ शर्मा र रमेश केसीको अर्थमा सरुवा भएको छ।
अर्थ मन्त्रालय अन्तर्गतको सार्वजनिक वित्त व्यवस्थापन तालिम केन्द्रका प्रमुख बाबुराम भण्डारीको ऊर्जा मन्त्रालयमा सरुवा भएको छ।
भण्डारी ऊर्जा तथा जलस्रोत मन्त्री पम्फा भुसाल निकट मानिन्छन्। भण्डारीलाई तत्कालीन अर्थमन्त्री कृष्णबहादुर महराले अर्थ मन्त्रालय ल्याएका थिए।
अर्थ भित्रिएकामध्ये बराल यसअघि राजस्व अनुसन्धान विभागका महानिर्देशक भइसकेका छन्। उनी अहिले लगानी बोर्डमा छन्।
अहिले सञ्चार मन्त्रालयमा रहेका पौडेल ठूला करदाता कार्यालयका प्रमुख भएका थिए। उनको आन्तरिक राजस्व विभागका तत्कालीन महानिर्देशक चुडामणि शर्मासँग राम्रो सम्बन्ध थियो। दुवै स्याङ्जाका हुन्।
शर्मा अहिले गण्डकी प्रदेशको आन्तरिक मामिला मन्त्रालयमा र केसी त्यहीँ आर्थिक मामिला तथा योजना मन्त्रालयमा छन्। उनी प्रशासनका अधिकृत र लेखाका उपसचिव हुन्।
