काठमाडौं- साझा यातायात सहकारीले साइटसिन बस खरिद गर्ने भएको छ। ललितपुर महानगरपालिकासँगको सहकार्यमा साझाले यस्ता बस खरिद गर्न लागेको हो। 

साझाले सहरी दृष्यावलोकनका लागि भन्दै चारवटा बस खरिद गर्न लागेको छ। 

ब्याट्रीबाट चल्ने चारवटा  विद्युतीय बस खरिदका लागि साझाले टेन्डर निकालेको छ। स्वदेशी व्यवसयीहरुमाझ प्रतिस्पर्धा गराएर बस खरिद गर्ने साझाले जानकारी गराएको छ। 

ललितपुर महानगरपालिकाले यसअघि पाटन दरबार क्षेत्र लगायतका सहरी ठाउँमा पर्यटकलाई अवलोकनका लागि विद्युतीय बस सञ्चालन गर्ने घोषणा गरेको थियो। 

अघिल्लो वर्षको बजेटमै घोषणा भएको यो कार्यक्रम सञ्चालनका लागि महानगरले साझासँग सहकार्य गरेको छ। 

ललितपुर महानगरले सार्वजनिक यातायातका लागि बस खरिदका लागि यसअघि नै साझासँग सहकार्य सुरु गरिसकेको छ।