काठमाडौं- सरकारी जग्गासमेत बैना गरी ठगी गरेको अभियोगमा दुईजनालाई शुक्रबार दिउँसो प्रहरीले पक्राउ गरेको छ।
पक्राउ पर्नेहरूमा भक्तपुर चाँगुनारायण नगरपालिका-७ बस्ने ७२ वर्षीय केशवप्रसाद अधिकारी र भक्तपुर नगरपालिका-८ बस्ने ५८ वर्षीय ईश्वर गाइजु रहेका छन्।
प्रहरीका अनुसार केशव प्रसाद अधिकारी समेतले भक्तपुर साविक सुडाल गाविस-४ ‘क’ मा रहेको विभिन्न कित्ता नम्बरहरू अर्कैको नाममा रहेको जग्गा सम्बन्धित जग्गा धनीसँग अनुमति नलिइ अनुमति लिएको छौँ भनी झुक्याउनुका साथै किता नम्बर ३९९ क्षेत्रफल (०-४-०-० ) सरकारी जग्गा रहेको देखिन आएकोले सो जग्गा समेत बिक्री गर्न करारनामा गरी बैना बापत ५ करोड २० लाख रुपैयाँ पीडितबाट ठगी गरेका थिए।
ठगीको सूचनापछि काठमाडौं उपत्यका अपराध अनुसन्धान कार्यालयबाट खटिएको प्रहरीले ठगीमा संलग्न उनीहरूलाई भक्तपुर नगरपालिका-१० मालपोत गेटबाट पक्राउ गरेको प्रहरीले जनाएको छ। उनीहरूलाई आवश्यक कारवाहीको लागि जिल्ला प्रहरी परिसर भक्तपुर पठाइएको छ ।
