काठमाडौं- राजस्व अनुसन्धान विभागले अवैध विदेशी मुद्रा लिएर नेपाल बाहिर जान लागेकाबेला जहाजबाटै पक्राउ परेका एक भारतीय नागरिकविरुद्ध मुद्दा दर्ता गराएको छ। 

विभागले भारतीय नागरिक सतिस परषोत्तम सजनानीविरुद्ध आज काठमाडौं जिल्ला अदालतमा विदेशी विनिमय अपचलन कसुरमा मुद्दा दर्ता गरेको हो। 

सजनानी गएको चैत १० गते फ्लाइ दुबइको जहाजबाट दुवइ जाने तयारीमा रहेको बेला अवैध विदेशी मुद्रासहित पक्राउ परेका थिए। 

ब्यागेज परीक्षणको क्रममा उनीबाट २० हजार १५० अमेरिकी डलरसहित अन्य केही विदेशी मुद्रा भेटिएको थियो। उनीसँग भएको विदेशी मुद्रा नेपाल राष्ट्र बैंकले दिने सुविधाभन्दा धेरै भएकाले पक्राउ गरी अनुसन्धान सुरु गरिएको थियो। 

अनुसन्धानबाट  उनीसँग भएको विदेशी मुद्रा अवैध देखिएकाले मुद्दा दर्ता गरिएको विभागले जानकारी दिएको छ। २२ लाख ८८८ रुपैयाँ बिगो दाबी गर्दै विभागले उनीविरुद्ध मुद्दा दर्ता गरेको हो।