काठमाडौं- निर्वाचन आयोगले बैशाखा ३० गते हुने स्थानीय तह निर्वाचनमा छपाइ गर्ने मतदाता परिचय पत्र लेमिनेशन नगर्ने भएको छ।
आयोगले झन्डै ३३ लाख मतदाता परिचय पत्र छपाइ गर्दै छ। यसरी छपाइ हुने मतदाता परिचय पत्र लेमिनेशन नगर्ने भएको हो। आयोगले निर्वाचन खर्च कम गर्ने नीति अनुरुपमा मतदाता परिचप पत्र लेमिनेशन नगरी वितरण गर्न लागेको जनाएको छ।
आयोगका सचिव गोकर्णमणि दुवाडीले लेमिनेश गर्दा बढी खर्च लाग्ने भएका कारण मतदाता परिचय पत्र लेमिनेशन गर्ने निर्णय गरेको बताए।
सोहीअनुसार मतदाता परिचय पत्र छपाईको काम सुरु भएको उनको भनाइ छ। अहिले एउटा मतदाता परिचय पत्र छपाइमा ३ रुपैयाँ हाराहारी मात्रै खर्च लागेको आयोगले जनाएको छ। तर विगतका निर्वाचनहरुमा मतदाता परिचय पत्र छपाइमा १३ रुपैयाँ ५० पैसासम्म खर्च भएको थियो।
मतदाता परिचय पत्र छपाइको विषय विवादमा परेसँगै कर्म खर्चमा पारदर्शिताका लागि लेमिनेशन नगर्ने निर्णय गरेको हो। आयोगले नयाँ थप भएका मतदाता र हराएको भनेर विवरण भर्ने मतदाताको मात्रै परिचय पत्र छपाइ गर्दै छ।
यस अघि निर्वाचन आयोगले २०७४ सालको पहिलो चरणमा भएको स्थानीय तहको निर्वाचनामा मतदाता परिचय पत्र सेटिङमा ९ रुपैयाँ ९० पैसा र यसपछिका निर्वाचनहरुमा भने ओम्नीसँग नै १३ रुपैयाँ ५० पैसामा प्रतिथान मतदाता परिचय पत्र छपाइ गरेको थियो। उक्त विषयमा अहिले पनि महालेखाले प्रश्न उठाउँदै आएको छ।
