काठमाडौं- बेलायती दुईपांग्रे सवारी ब्रान्ड रोयल इनफिल्डको आधिकारिक बिक्रेता नियुक्त भएसँगै त्रिवेणी समूहले देशभर डिलर माग गरेको छ। त्रिवेणी समूह अन्तर्गतको अल्फा अटोमोबाइल प्रालिले काठमडौंसहित देशभरका १८ वटा सहरमा डिलर राख्नका लागि आह्वान गरेको हो।
अल्फाले बिर्तामोड, विराटनगर, राजविराज, लाहन, वीरगञ्ज, हेटौंडा र काठमाडौका लागि स्थानीय डिलर मागेको हो। त्यस्तै कम्पनीले भक्तपुर, लेखनाथ, स्याङजा, बागलुङ, दमौली, भैरहवा, कपिलवस्तु, नेपालगञ्ज, गुलरिया, टिकापुर र धनगढीका लागि डिलर मागेको हो।
डिलर लिन इच्छुकहरुले कम्पनीहरुले ३१ मार्चसम्म आवेदन दिइसक्नु पर्ने छ।
हालैमात्र रोयल इनफिल्डको नेपालका लागि आधिकारिक बिक्रेतामा त्रिवेणी समूह नियुक्त भएको थियो। पुरानो आधिकारिक बिक्रेताबाट असन्तुष्ट बनेको रोयल इनफिल्ड इन्डियाले नेपालमा नयाँ आधिकारिक बिक्रेता नियुक्त गरेको हो।
यसअघि नेपाली बजारमा रोयल इनफिल्डका मोटरसाइकल दुगड समूहले बिक्री गर्दै आएको थियो। विगत २० वर्षदेखि रोयल इनफिल्डको आधिकारिक बिक्रेता रहेको विवेक अटोमोबाइल्स प्रालीबाट यो ब्रान्ड खोसिएको हो।
