काठमाडौं- भारतबाट पहिलो पटक निजी कम्पनीको कार्गो रेल वीरगञ्ज आइपुगेको छ। बुधरबार बिहान कार्गो सामान बोकेको रेल वीरगञ्ज आइपुगेको हो।
हिन्द टर्मिनलले भारतको हल्दिया बन्दरगाहबाट निजी कार्गो सेवा सुरु गरेको हो। हिन्द टर्मिनलको रेल ९० वटा कन्टेनर लिएर वीरगञ्ज सुक्खा बन्दरगा आइपुगेको छ।
सोमबार हल्दिया बन्दरगाहबाट हिँडेको रेल बुधबार बिहान वीरगञ्ज आएको हो। नेपालमा रेलवेमार्फत सामान ढुवानीमा निजी सेवाप्रदायक प्रवेश गरेको हो।
नेपाल भारतबीच सन् २००४ मा भएको रेल सेवा सम्झौताले रेलमार्फत हुने ढुवानीमा भारतीय कन्टेनर निगम (कोन्कर) लाई एकाधिकार दिएको थियो।
तर उक्त सम्झौता केही महिनाअघि संशोधन भएसँगै निजी कार्गो रेलले पहिलो पटक सामान लिएर नेपाल आएको हो।
संशोधित सम्झौताले भारतका निजी रेल सेवाप्रदायक र नेपाल रेलवे कम्पनीले ढुवानी गर्न सक्ने व्यवस्था गरेको थियो।
त्यसअघि भारतका कोलकाता, हल्दिया र विशाखापट्नम बन्दरगाहबाट हुने कन्टेनर र अन्य कार्गाे ढुवानीमा कोन्करको एकाधिकार थियो।
