काठमाडौं- अमेरिकी कार उत्पादक कम्पनी फोर्डले भारतको उत्पादन बन्द गर्ने घोषणा गरेको छ। कम्पनीले उत्पादन क्षमता अनुसारको बजार नभएपछि प्लान्ट बन्द गरेर कार आयात गरि बिक्री गर्ने भएको छ।

उत्पादन क्षमताअनुसार कार उत्पादन नहुँदा सञ्चि नोक्सानी २ अर्ब अमेरिकी डलर भन्दा बढी पुगेसँगै कम्पनीले प्लान्ट बन्द गर्ने निर्णय गरेको इकोनोमिकटाइम्सले लेखेको छ। फोर्डको भारतीय प्लान्ट बन्दा हुँदा करिब ४ हजारको रोजगारी प्रभावित हुने अनुमान गरिएको छ।

भारतमा उत्पादित इकोस्पोर्टस्, एस्पायर, फिगो तथा फ्रिस्टाइललगायत मोडलका कारको बजार राम्रो छ। यी मोडलका कारहरु भारतसहित नेपालमा समेत उल्लेख्य रुपमा बिक्री हुँदै आएको छ।

फोर्डले भारतमा २ अर्ब ५० करोड डलरभन्दा बढी लगानी गरेको थियो। तर हाल भारतमा फोर्डको सञ्ति नोक्सानी नै २ अर्ब डलर नाघेको छ। 

फोर्डले भारतको आन्तरिक बजारका लागि २०२१ को अन्त्यदेखि र निर्यात प्रयोजनका लागि २०२२ को मध्यतिरबाट उत्पादन बन्द गर्ने भएको हो।