घोराही- दाङमा पछिल्लो समय सल्लाको खोटोबाट आम्दानी बढ्दै गएको छ। खोटो बिक्री गरेर वन समूहले आम्दानी गर्न थालेपछि खोटो संकलन गर्ने क्रम पनि बढेको हो।

आर्थिक वर्ष २०७९/८० मा जिल्लाका नौवटा समुदायिक वनबाट एक लाख सात हजार नौ सय सात केजी खोटो संकलन भएर बिक्री हुँदा १२ लाख ९४ हजार सातसय चार रूपैयाँ आम्दानी भएको डिभिजन वन कार्यालयका प्रमुख मोहन श्रेष्ठले जानकारी दिए।

आव २०७८/७९ मा सात हजार दुईसय ५६ केजी सल्लाको खोटो संकलन गरिएको थियो। उक्त वर्ष खोटो बिक्रीबाट नौ लाख ३९ हजार २७ रूपैयाँ मात्रै आम्दानी भएको थियो। अघिल्लो आवको तुलनामा पछिल्लो समय सल्लाको खोटो संकलन गर्ने कार्य बढेको उनको भनाइ थियो।

आव २०७९/८० मा बागेश्वरी सामुदायिक वनबाट दुई हजार दुईसय १० केजी खोटो निकासी हुँदा २६ हजार पाँच सय २० रूपैयाँ, सरस्वती सामुदायिक वन समूहबाट २५ हजार ८० केजी खाटो बिक्री हुँदा तीन लाख नौसय ६० रूपैयाँ आम्दानी गरेका गरेका थिए।

त्यसैगरी, गैरीकुण्ड दर्शाकोट सामुदायिक वन समूहबाट २० हजार छ सय ५८ केजी खोटो बिक्री हुँदा दुई लाख ४७ हजार आठ सय ९६ रूपैयाँ, जौलीपोखरी सामुदायिक वन समूहबाट सात हजार तीन सय दुई केजी खोटो बिक्री हुँदा ८७ हजार छ सय २४ रूपैयाँ, घोरले संगरगैरा सामुदायिक वन समूहबाट तीन हजार ४३ केजी खोटो बिक्री हुँदा ३६ हजार पाँचसय १६ रूपैयाँ आम्दानी भएको छ।

यस्तै जनचेतना सामुदायिक वन समूहबाट आठ हजार चार सय ५० केजी खोटो बिक्री हुँदा एक लाख एक हजार चारसय रूपैयाँ, शिव सामुदायिक वन समूहबाट एक हजार आठ सय ३२ केजी खोटो बिक्री हुँदा २१ हजार आठ सय ८४, भूमेवराह सामुदायिक वन समूहबाट सात हजार आठ सय ७५ केजी खोटो बिक्री गर्दा ९४ हजार पाँचसय र ओखलढुंगा सामुदायिक वन समूहबाट ३१ हजार चार सय ५४ केजी खोटो बिक्री गर्दा तीन लाख ७७ हजार चार सय ८४ आम्दानी भएको प्रमुख श्रेष्ठले जानकारी दिए।

सल्लाको खोटो बिक्री गरेर आम्दानी भएको ७५ प्रतिशत रकम सम्बन्धित वन समूहको कोष र २५ प्रतिशत रकम प्रदेश सञ्चित कोषमा जम्मा हुने गरेको उनको भनाइ थियो। 

जिल्लामा बंगलाचुली गाउँपालिकाबाट खोटो संकलन हुने गरेको छ। सामुदायिक वन समूहले जंगलमा रहेका सल्लाका रूखबाट उत्पादन हुने खोटो बिक्री गरेर वार्षिक लाखौँ रूपैयाँ आम्दानी गरेर सामाजिक कार्यमा लगाउने गरेका छन्।

वन समूहले सल्लाहको खोटो बिक्री गरेर भएको आम्दानी वन समूहकै संरक्षणसँगै खानेपानीका लागि धारा, बाटो र विद्यालय निर्माणमा तथा सामुदायिक वन सुधार कार्यमा लगाउने गरेको ओखलढुंगा सामुदायिक वन समूहका सचिव लोकबहादुर गाहामगरले बताए।

उक्त वन समूहले जिल्लामा सबैभन्दा धेरै खोटो बिक्री गर्दै आएको छ। जिल्लामा समुदायिक वनबाट संकलन भएको खोटो गंगा रोजिन एन्ड गम टर्पिनटाइन कम्पनीले प्रतिकेजी १२ रूपैयाँका दरले खरिद गर्ने गरेको छ। रासस