काठमाडौं- अध्यागमन विभागका महानिर्देशक झलकराम अधिकारी गृह मन्त्रालयमा तानिएका छन्। सुन तस्करी प्रकरणमा मुछिएका तिब्बती मूलका बेल्जियन नागरिक दावा शेर्पासँग गरेको संवाद बाहिरिएपछि अनुसन्धानका लागि भन्दै उनलाई विभागबाट हटाइएको हो। 

अधिकारीलाई गृह मन्त्रालयको अतिरिक्त समूहमा ल्याइएको जनाइएको छ। गृह मन्त्रालयमा तानिएका उनीमाथि अब सुन तस्करी प्रकरणका अन्य विषयका साथै उक्त व्यक्तिसँगको संवादबारे पनि अनुसन्धान हुनेछ। उनीसँग संवाद गरेका भनिएका दावा भने अझै फरार छन्।

६० किलो ७ सय १६ ग्राम सुन तस्करीका मुख्य योजनाकारमध्येका एक मानिएका दावासँग अध्यागमन विभागका महानिर्देशक अधिकारीको 'कनेक्सन' रहेको भन्दै उनको कुराकानीको 'स्क्रिनसट'समेत बाहिरिएपछि उनीमाथि अनुसन्धान हुने भएको हो। 

यसअघि पनि गृहमा नै रहेका सहसचिव अधिकारी २०७९ फागुन दोस्रो साता अध्यागमन विभागका महानिर्देशकको जिम्मेवारीमा पठाइएका थिए। राजस्व अनुसन्धान विभागको महानिर्देशकका रुपमासमेत काम गरिसकेका अधिकारीले यसअघि ठूला करदाता कार्यालयको जिम्मेवारी समेत सम्हालेका थिए।