काठमाडौं- वैदेशिक रोजगारीको प्रलोभन देखाएर अष्ट्रेलिया र दुबई पठाइदिन्छु भनेर लाखौँ ठगी गर्ने दुई जनालाई प्रहरीले पक्राउ गरेको छ।

अष्ट्रेलिया पठाइदिन्छु भन्दै रकम ठगी गरेको अभियोगमा चितवनका २७ वर्षीय सञ्जय रेग्मीलाई आइतबार प्रहरीले पक्राउ गरेको छ। काठमाडौंको लाजिम्पाट बस्दै आएका रेग्मीले अष्ट्रेलियाको प्रतिष्ठित कम्पनीमा ३ लाख रूपैयाँभन्दा बढी तलबमा काम लगाइदिन्छु भन्दै पीडितबाट पटकपटक गरी ३० लाख रूपैयाँ लिई ठगी गरेको प्रहरीले जनाएको छ। 

दरबारमार्गबाट पक्राउ परेका रेग्मी लाजिम्पाटस्थित माझी बिष्ट्रो रेष्टुरेण्टका सञ्चालकसमेत रहेको पाइएको छ। 

यस्तै ६० हजार तलबमा दुबई पठाइदिन्छु भन्दै पीडितबाट पटकपटक गरी ३ लाख ५० हजार रूपैयाँ ठगी गरेको अभियोगमा तनहुँका २६ वर्षीय मन बहादुर कुमाललाई शुक्रबार दिउँसो प्रहरीले पक्राउ गरेको छ। काठमाडौंको सामाखुसी बस्दै आएका कुमाल नयाँ बसपार्कबाट पक्राउ परेका हुन्।

यूरो टेक कन्सलटेन्सी प्रालिका मार्केटिङ मेनेजरसमेत रहेका कुमाल र रेग्मी दुवैलाई थप अनुसन्धान तथा कारबाहीका लागि वैदेशिक रोजगार विभाग बुद्धनगर पठाइएको प्रहरीले जनाएको छ।