काठमाडौं- नेपाल वायु सेवा निगमले मलेसियाको नियमित उडान तालिकाको विकल्पमा चार्टर्ड उडानका लागि अनुमति पाएको छ। नेपाल नागरिक उड्डयन प्राधिकरणले नेपाल वायु सेवा निगमलाई तत्कालको अवस्थामा मलेसियाका लागि चार्टर्ड उडान अनुमति दिएको हो।

प्राधिकरण प्रवक्ता जगनाथ निरौलाका अनुसार निगमले काठमाडौं- मलेसिया- काठमाडौंका लागि सातामा ५ वटा चार्टर्ड उडान अनुमति पाएको छ। यसैगरी निगमले काठमाडौं- मलेसिया- भरैहवा (गौतम बुद्ध अन्तर्राष्ट्रिय विमानस्थल)-काठमाडौंका लागि २ वटा चार्टर्ड उडान अनुमति पाएको छ।

निगमले अहिले चार्टर्ड अनुमति पाए पनि उसले सबै प्रक्रिया पूरा गरेर नियमति उडान तालिका नै स्वीकृत गर्नुपर्ने प्राधिकरणले जनाएको छ। निगमले फरेन एयर अपरेटर सर्टिफिकेट (एफओसी) नवीकरणमा ढिलाइ गरेसँगै मलेसियाको नियामक निकायले नियमित उडानको अनुमति  दिएको छैन।

निगमले नियमित उडान तालिका स्वीकृत नगरी चार्टर्ड उडानको अनुमति मागेपछि प्राधिकरणले सोमबार मात्रै निगमलाई स्पष्टीकरण सोधेको थियो। प्राविधिक कारण उडानमा समस्या भएको जवाफसँगै प्राधिकरणले चार्टर्ड उडानमा अनुमति दिएको निरौलाले जानकारी दिए। सोहीअनुसार निमगले आजदेखि नै चार्टर्ड उडान सुरु गरेको छ।  

अब निगमले प्राधिकरणबाट स्वीकृत भएको गृष्मकालीन उडान तालिकाअनुसार काठमाडौं-मलेसिया-काठमाडौं रुटमा साताको पाँच उडान गर्नेछ भने दुईवटा काठमाडौं-मलेसिया- भैरहवा-काठमाडौं उडान गर्ने छ।

तर भैरहवाबाट काठमाडौं आउँदा निगमले यात्रु थप्न पाउने छैन। मलेसियाबाट लिएर आएको यात्रु भैरहवाका झारेर काठमाडौं आउने छ। तर सोही उडानमा काठमाडौं आउने गरी आएका यात्रु भने ल्याउन पाउने छ। यो गन्तव्यका लागि नेपाल एयरलाइन्सले मंगलबार र शनिबार गरी सातामा दुईउडान गर्ने छ। 

निगम नेतृत्वले बिर्सियो मलेसिया उडानको अनुमति, चार्टर्ड उडानमार्फत कमाउने दाउ