काठमाडौं- चालु आर्थिक वर्षको बजेटको प्रभावकारी कार्यान्वयनका लागि सार्वजनिक निजी क्षेत्र संवादको रुपमा ‘बजेट वाच’ सुरु गरिएको छ । नेपाल उद्योग परिसंघको आयोजना, नेपाल आर्थिक पत्रकार समाज (सेजन) को सहआयोजना तथा पायोनियर ल फर्मको बौद्धिक साझेदारीमा ‘सीएनआई बजेट वाच’ शुरु गरिएको हो। नेपाल सरकारले ल्याएको वार्षिक बजेटको प्रभावकारी कार्यान्वयनमार्फत लिइएका लक्ष्यहरु हासिल गर्न रचनात्मक भूमिका निर्वाह गर्ने उद्देश्यका साथ यो पहल सुरु गरिएको हो ।

बजेट वाचअन्तर्गत चालु आर्थिक वर्षको बजेटमा उल्लेख भएका उद्योग व्यवसाय, विकास निर्माणसँग सम्बन्धित विभिन्न विषयवस्तुका बारेमा छलफल गरिनेछ। त्यसका लागि औद्योगिक विकास, भूमि, नवप्रवर्तन, प्रत्यक्ष वैदेशिक लगानी, औद्योगिक क्षेत्र व्यवस्थापन, मेक इन नेपालः स्वदेशी, उर्जा, निर्यात प्रबर्द्धन, कृषि, पूर्वाधार, साना तथा मझौला उद्योग, पर्यटन, सार्वजनिक निजी साझेदारी, सूचना प्रविधिसँग सम्बन्धित ५५ वटा बुँदाका बजेट शीर्षक पहिचान गरिएको छ ।
५५ वटा बुँदालाई नवउद्यम्, नवप्रवर्तन र सूचना प्रविधि. पर्यटन, उद्योगः औद्योगिक विकास, औद्योगिक क्षेत्र व्यवस्थापन, साना तथा मझौला उद्योग, लगानीः सार्वजनिक निजी साझेदारी र प्रत्यक्ष वैदेशिक लगानी, ऊर्जा, पूर्वाधारः सडक, हवाई सम्पर्क, कृषि, स्वदेशी उत्पादन र निर्यात प्रवद्र्धन तथा अन्य क्षेत्रमा वर्गीकरण गरिएको छ । वर्गीकरण गरिएका ८ वटै विषयवस्तुमा घोषित कार्यक्रमको प्रगति ट्रयाक गर्नुका साथै नेपाल सरकारका प्रतिनिधि र सम्बन्धित क्षेत्रका सरोकारवालाबीच छुट्टाछुट्टै रुपमा गहन छलफल गरिनेछ । यसको सुरुवात स्वरुप शुक्रवार नवउद्यम, नवप्रवर्तन र सूचना प्रविधिका क्षेत्रका विषयमा छलफल गरिएको थियो ।। 

बजेट वाच  कार्यक्रमको शुरुआत गर्ने कार्यक्रममा प्रमुख अतिथि नेपाल सरकारका मुख्यसचिव डा. शंकरदास वैरागीले देशको विकासका लागि उद्योग क्षेत्रको  प्रगति अनिवार्य रहेको बताए । पूँजीगत खर्च अपेक्षाकृत रुपमा बढ्न त्यसतर्फ ध्यान दिन नेपाल सरकारका  सचिवहरु तथा उच्चपदस्थ कर्मचारीलाई निर्देशन समेत दिए। “नीतिगत सुधार गर्न कहाँ हस्तक्षेप गर्नुपर्छ, त्यहाँ निजी क्षेत्रबाट सुझावको अपेक्षा गरेका छौं” उनले भने, “सरकारले लिएका योजना तथा कार्यक्रम सुधार सही दिशामा छ कि छैन, ठिक मार्गमा छ कि छैन भन्नेमा इमादारिताका साथ हेर्नुपर्छ ।” अर्थतन्त्र सहज अवस्थामा नभएको भन्दै उनले त्यसबारेमा सरकार जानकार रहेको पनि बताए । 

कार्यक्रममा नेपाल उद्योग परिसंघका अध्यक्ष विष्णुकुमार अग्रवालले बजेट राम्रो आउने तर कार्यान्वयन कमजोर हुने गरेको सन्दर्भमा परिसंघले निजी क्षेत्रको तर्फबाट पनि बजेटको सफल कार्यान्वयनका लागि यो पहल सुरु गरेको बताए। परिसंघले दिएका सुझावमध्ये ४० प्रतिशत बढी चालु आर्थिक वर्षको बजेटमा समावेश भएका छन् । बजेटमा समावेश भएका विषयहरुको पूर्ण कार्यान्वयन गर्दै मुलुकलाई औद्योगिकरणमा लैजानुपर्ने आवश्यकता रहेको उनले बताए। “यो बजेटको प्रभावकारी कार्यान्वयनले मुलुक औद्योगीकरणमा जान सक्छ” उनले भने । 
कार्यक्रममा उद्योग, वाणिज्य तथा आपूर्ती मन्त्रालयका सचिव डा. तोयनारायण ज्ञवाली, कानून न्याय तथा संसदीय मामिला मन्त्रालयका सचिव उदयराज सापकोटा, सञ्चार तथा सूचना प्रविधि मन्त्रालयका सचिव डा. बैकुण्ठ अर्याल, प्रधानमन्त्री तथा मन्त्रिपरिषद् कार्यालयका सचिव मधुकुमार मरासिनीलगायतले बजेट कार्यान्वयको अवस्थाका विषयमा जानकारी गराए । 
नेपाल उद्योग परिसंघका उपाध्यक्ष राजेश अग्रवालले सिएनआई बजेट वाच पहल र यसबाट गरिएको अपेक्षाको विषयमा जानकारी गराएका थिए।

नेपाल आर्थिक पत्रकार समाज (सेजन) का अध्यक्ष जनार्दन बरालले बजेट वाचमा समावेश गरिएका विषयहरुबारे प्रस्तुति दिएका थिए। उनले बजेट कार्यान्वयन शुरु भएको पाँच महिना भइसक्दा पनि कार्यान्वयन न्यून रहेको बताए । 
यस कार्यक्रमबाट नेपाल सरकारको वार्षिक बजेट (नीति तथा कार्यक्रम) कार्यान्वयनको प्रभावकारिताका लागि निजी क्षेत्रबाट सहयोगीको भूमिका तथा रचनात्मक निष्कर्षहरु हासिल हुने, बजेट कार्यान्वयन र (न्यून) पुँजीगत खर्चको निराशाजनक प्रवृत्तिमा सुधार आउने विश्वास परिसंघले लिएको छ । 
कार्यक्रममा विभिन्न मन्त्रालयका सहसचिव, विभिन्न विभागका महानिर्देशकहरु, उद्योगी व्यवसायीहरु, युवा उद्यमीहरुलगायत सहभागी थिए।