काठमाडौं- मुलुकभित्रको विद्युत प्रसारण तथा वितरण प्रणाली सुदृढीकरणका लागि सुनसरीमा निर्माणाधीन ग्याँस इन्सुलेटेड प्रणालीमा आधारित (जीआईएस) ४०० केभी र २२०/१३२/३३ केभी इनरुवा सवस्टेसनको काम धमाधम भइरहेको छ। यो सबस्टेसान आगामी पुसभित्र निर्माण सम्पन्न गरी संचालन गर्ने लक्ष्यका साथ दुवै सवस्टेसनको काम भइरहेको छ। 

निर्माण सम्पन्न भएपछि पूर्व-पश्चिम विद्युत आपूर्ति गर्ने प्रसारण प्रणालीका लागि इनरुवा सवस्टेसन अर्को ठूलो हब बन्ने छ। सवस्टेसनमार्फत राष्ट्रिय प्रसारण प्रणालीमा विद्युत प्रवाहका अतिरिक्त स्थानीय रुपमा आपूर्ति समेत गरिने नेपाल विद्युत प्राधिकरणले जनाएको छ। 

४०० केभी र २२०/१३२/३३ केभी सवस्टेसनका अधिकांश सिभिल संरचनाको निर्माण सम्पन्न भइसकेको छ। साथै ट्रन्सफर्मर, रियाक्टर सर्किट ब्रेकरजस्ता मुख्य उपकरणहरु निर्माणस्थलमा ल्याइसकिएको छ। २२०/१३२/३३ केभी सवस्टेसनका उपकरणहरु जडान भइसकेको प्राधिकरणको भनाइ छ। ४०० केभी र २२०/१३२/३३ केभी सवस्टेसनको समग्र निर्माण प्रगति क्रमश : ६५ र ८५ प्रतिशत छ। 
नेपाल विद्युत प्राधिकरणका कार्यकारी निर्देशक कुलमान घिसिङले निर्माणस्थलको अवलोकन र निर्माणमा संलग्न आयोजना व्यवस्थापन, ठेकेदार कम्पनी, परामर्शदातासँग छलफल गरी निर्धारित समयमै काम सम्पन्न गर्न आग्रह गरेका छन्। 

‘मोरङ-सुनसरी औद्योगिक करिडोरका उद्योगहरुलाई थप विद्युत दिन र आपूर्तिलाई भरपर्दो तथा गुणस्तरीय बनाउन इनरुवा सवस्टेसनको निर्माण तत्काल सक्नु पर्ने बाध्यता छ। मेरुदण्डको रुपमा रहेको सवस्टेसन निर्माणमा आइपर्ने समस्या तत्काल समाधान गर्न तयार छौं’, उनले भने, ‘सवस्टेसन तयार भएपछि कोशी करिडोर २२० केभी प्रसारण लाइनलाई २२० केभीमा चार्ज गर्न सकिन्छ। त्यसपछि यस क्षेत्रमा विद्युत आपूर्तिका लागि स्रोत उपलब्ध हुने छ, जसले प्रणालीलाई विश्वसनीय बनाउने छ।’ 

अरुण तथा तमोर नदी र त्यसका सहायक खोलामा निर्माण गरिएका जलविद्युत आयोजनाबाट उत्पादित विद्युत कोशी  करिडोर २२० केभी प्रसारण लाइनमार्फत इनरुवा सवस्टेसनमा जोडिने छ। कोशी करिडोरको इनरुवा-बसन्तपुर-तुम्लिङटार खण्ड निर्माण सम्पन्न भइसकेको छ भने वसन्तपुर-ढुंगेसाँघु खण्ड निर्माणाधीन छ।   

सरकारको लगानीमा निर्माण भइरहेको ४०० केभी सवस्टेसन निर्माणका लागि २०७५ पुसमा ठेक्का सम्झौता भएको थियो। नेपाल सरकारको लगानी र विश्व बैंकको सुहलितपूर्ण ऋणमा नेपाल-भारत विद्युत प्रसारण तथा व्यापार आयोजनाअन्तर्गत २२०/१३२/३३ केभी सवस्टेसनको निर्माण गरिएको हो। सवस्टेसन निर्माणका लागि भएको पुरानो ठेक्कालाई रद्ध गरी २०७५ पुसमा नयाँ ठेक्का गरिएको थियो। 

वर्खाको समयमा तराईमा हुने डुवान, विश्वव्यापी रुपमा फैलिएको कोभिड-१९ रोकथाम तथा नियन्त्रणका लागि लागू गरेको बन्दाबन्दी र निषेधाज्ञाका कारण उपकरण तथा प्राविधिकहरु आउन नसक्दा सवस्टेसनको निर्माण प्रभावित भएको थियो। अहिले ४०० र २२० केभी सवस्टेसनको निर्माण आगामी पुसभित्र सक्ने लक्ष्य राखिएको छ। 

उत्पादित विद्युतको आन्तरिक खपत एवं द्धिपक्षीय तथा क्षेत्रीय विद्युत व्यापार प्रवद्र्धन लागि आन्तरिक प्रसारण एवं वितरण र अन्तरदेशीय प्रसारण प्रणालीहरुको विस्तार तथा सदृढीकरण गरिएको हो। 

नेपाल-भारतबीच विद्युत व्यापारका लागि कुशाहा-पूर्णिया अन्तरदेशीय प्रसारण लाइनको प्रस्ताव गरिएको छ। लाइन निर्माण गरिएमा इनरुवा सवस्टेसनबाटै विद्युत प्रवाह गरिने छ।