काठमाडौं- नेपाल क्रेडिट एण्ड कमर्श बैंक लिमिटेड (एनसीसी) बैंकले आर्थिक वर्ष २०७७\७८ अघिल्लो वर्ष भन्दा १४.६८ प्रतिशत नाफा बढाएको छ। बैंकले १ अर्ब २७ करोड १२ लाख ३३ हजार रुपैयाँ खुद नाफा कमाएको हो। बैंकले अघिल्लो वर्ष १ अर्ब १० करोड ८४ लाख ७३ हजार रुपैयाँ खुद नाफा गरेको थियो।
वितरणयोग्य मुनाफा भने जम्मा २.१२ प्रतिशत बढेर ७१ करोड ४७ लाख ५९ हजार रुपियाँ रहेको छ। यसको कुल सञ्चालन मुनाफा १२.३२ प्रतिशत बढेर चार अर्ब ५३ करोड ५ लाख ८२ हजार रुपियाँ रहेको छ।
गत आवसम्ममा बैंकले चुक्ता पुँजी १०.२७ प्रतिशत बढाएको छ। यस्तो पुँजी १० अर्ब ३१ करोड ४५ लाख १६ हजार रुपैयाँ पुगेको छ। यसको जगेडा कोष १२.१७ प्रतिशत बढेर चार अर्ब २७ करोड तीन लाख ९२ हजार रुपैयाँ रहेको छ।
बैंकले निक्षेप ४६.४९ प्रतिशत बढेर एक खर्ब ६ अर्ब ६६ करोड ७१ लाख ५२ हजार रुपैयाँ पुगेको छ भने कर्जा ४५.३९ प्रतिशत बढेर ९४ अर्ब ५३ करोड ७६ लाख ५० हजार रुपैयाँ पुगेको छ। बैंकको प्रतिशेयर आम्दानी ४७ पैसा बढेर १२ रु ३२ पैसा पुगेको छ । बैंकको मूल्य आम्दानी अनुपात २९.७८ गुणा रहेको छ भने प्रतिशेयर नेटवर्थ १४१ रुपैयाँ ४० पैसा रहेको छ।
