काठमाडौं- काठमाडौं महानगरपालिकाले महानगर भित्र व्यवसाय गरि दर्ता नभएका व्यवसायीहरुलाई दर्ता गर्न आग्रह गरेको छ। महानगरले अबको ३० दिनभित्र आफ्नो सीमामा दर्ता भएका व्यवसायलाई दर्ता हुन आउन सूचना जारी गरेको छ।
कात्तिक १ गते सूचना प्रकाशित गरेर महागनरले ३० दिनभित्र दर्ता हुन नआउनेको व्यवसाय बन्द गर्ने उल्लेख गरेको छ। महानगरले आफ्नो सीमा क्षेत्रमा रहेका व्यवसायीले संघ वा प्रदेशमा दर्ता भएपनि महानगरमा अनिवार्य दर्ता हुनुपर्ने व्यवस्था रहेको छ। सोही अनुसार महानगरले दर्ता हुन आउन सूचना जारी गरेको हो।
तोकिएको समयमा दर्ता हुन नआए काठमाडौं महानगरपालिका राजस्व ऐन २०७५ अनुसार व्यवसाय बन्द गरि जरिवाना समेत गरिने महानगरले जनाएको छ। साथै महानगरको आर्थिक ऐन २०७९ अनुसार आर्थिक वर्ष २०७२/७३ लाई आधार वर्षका रुपमा लिइ व्यवसाय कर असुल गरिने महानगरले उल्लेख गरेको छ।
