त्रिवेणी- नवलपरासी (बर्दघाट सुस्तापूर्व) नवलपुरमा रहेको एक सहकारीले दसैँमा मात्रै ७० लाख रुपैयाँ बराबरको खसीबोका बिक्री गरको छ। दसैँ सुरु भएयताको समयमा जिल्लाको हुप्सेकोट गाउँपालिका-४, झ्यालबासमा रहेको लेकबेँसी सामाजिक उद्यमी महिला सहकारी संस्थाले ७० लाख बराबरको खसीबोका बिक्री गरेको हो।
सहकारीका व्यवस्थापक सुशीला परियारका अनुसार सहकारीले यस वर्ष चार सय ५० खसीबोका बिक्री गरेको छ। किसानबाट खसीबोका संकलन गरी सहकारीले स्थापना गरेको संकलन केन्द्रमार्फत बिक्री गर्दै आएको छ।
जिल्लाको पहाडी भेगका किसानले हुर्काएका खसीबोका सहकारीले संकलन गरी बिक्री गरेको हो। जिउँदो तौल प्रणाली अनुसार सहकारीले यस वर्ष खसीबोका प्रतिकेजी पाँच सय ३० देखि पाँच सय ६० रुपैयाँसम्ममा बिक्री गरेको उनले बताए।
सहकारीले किसानबाट खसीबोका संकलन गरी बिक्री गर्दा किसानले पनि उचित मूल्य पाउने र किसानलाई बजारीकरणको दुःखसमेत नहुने उनको भनाइ छ। 'अरू खसीबोका किन्न गए मूल्यको ठेगान हुँदैन, हामीले तोकिएको मूल्य र सही तौल मापन गरी लिन्छाैं, किसानलाई उचित मूल्य दिन्छौँ', व्यवस्थापक परियारले भने, “किसानलाई कहाँ बेच्न भन्ने चिन्तासमेत हुँदैन।'
उनका अनुसार अघिल्ला वर्षभन्दा यस पटक खसीबोका निकै कम बिक्री भएको छ। गत वर्ष करिब एक हजार र त्यसअघिको दसैँमा एक हजार सात सय ५५ वटा खसीबोका बिक्री गरेकामा यस वर्ष निकै कम बिक्री भएको छ। अहिले बजारको मन्दी भएर हो वा के कारणले कम मात्रामा माग भएको यसै भन्न नसकिने व्यवस्थापक परियारले बताए। कोभिडपछिका असरहरु बजारमा देखिएको हुनसक्ने उनको आंकलन रहेको छ।
सहकारीले विगत ६ वर्षदेखि सामान्य मुनाफा राखी कृषकहरुबाट खसीबोका संकलन गरी बिक्री गर्दै आएको छ। जिल्लाको मध्यविन्दु नगरपालिका-१२, तमासपुरमा रहेको अरुणज्योति सामाजिक महिला उद्यमी सहकारी साथै मैनाघाटमा रहेको कृषि सहकारीले समेत खसीबोका संकलन तथा बिक्री गरेको छ।
जिल्लामा रहेका सहकारीले कृषकबाट खसीबाख्रा खरिद गरी बिक्री गर्दा बजारीकरणमा बाख्रापालक किसानलाई सहजता मिलेको छ। किसानलाई आफ्ना खसीबोका कहाँ लगेर बेच्न भन्ने चिन्ता हटेको छ।
नवलपुरको पहाडी क्षेत्रमा प्रशस्त चरण क्षेत्र रहेकाले सो क्षेत्रका धेरै जसो किसानले बाख्रा पाल्ने गरेका छन्। सहकारीले सहजरूपमा बाख्रा खरिद गरिदिने र आम्दानीसमेत राम्रो लिन सकिने भएपछि पहाडी क्षेत्रका किसान बाख्रापालनतर्फ आकर्षित बनेका छन्। रासस
