काठमाडौं- टीभीएसका दुईपांग्रे सवारी साधानको आधिकारिक बिक्रेता समेत रहेको जगदम्बा मोटर्सको कारोबार लगातार दोस्रो वर्ष स्थिर रहेको छ।
आर्थिक वर्ष २०७८/७९ मा यो कम्पनीले अघिल्लो वर्षकै जति कारोबार गरेको छ। ऋणका लागि कम्पनीले गएको रेटिङ अनुसार कारोबार रकम २०७७/७८ कै जति कायम रहेको छ।
कम्पनीले २०७८/७९ मा १३ अर्ब ६२ करोड रुपैयाँको कारोबार गरेको छ। यो कम्पनीले टीभीएस बाहेक प्रोटोनका चार पांग्रे साधन र टीभीएसकै तीन पांग्रे सवारीसाधन तथा लुब्रिकेन्ट्सको कारोबार गर्दै आएको छ। यद्यपि यसमा सबैभन्दा धेरै टीभीएसका दुईपांग्रे सवारीबाट धेरै आम्दानी हुने गरेको छ।
२०७७/७८ मा टीभीएसका दुईपांग्रेको कारोबारमा उछाल आएपछि एकैपटक दोबर कारोबार बढेपनि गएको वर्ष भने उल्लेखनीय वृद्धि हुन सकेको छैन।
कम्पनीको आम्दानीमा खासै वृद्धि नभएपनि मार्जिन भने बढाएको छ। कूल आम्दानीको १५.७६ प्रतिशत सञ्चालन मुनाफा हुने प्रक्षेपन गरेको छ। जुन अघिल्लो वर्ष १४.६८ प्रतिशत मात्र थियो।
