काठमाडौं- चालु आर्थिक वर्षको पहिलो महिनामै विदेशी मुद्राको सञ्चिति १.२ प्रतिशतले घटेको छ। आयात प्रतिबन्ध, रेमिट्यान्समा वृद्धि भएपनि विदेशी मुद्राको सञ्चिति साउनमै १२ करोड अमेरिकी डलर घटेको छ।
नेपाल राष्ट्र बैंकको तथ्यांक अनुसार असार मसान्तसम्म ९ अर्ब ५४ करोड अमेरिकी डलर बराबरको विदेशी मुद्राको सञ्चिति रहेकोमा साउन मसान्तसम्म ९ करोड ४२ करोड डलरमा सीमित भएको छ।
आयात घटेका कारणले गर्दा डलर सञ्चितिमा कमी आएपनि आयात सक्षमता महिना भने बढेको छ। राष्ट्र बैंकका अनुसार अहिलेको सञ्चितिले साउनमा भएको जस्तै आयात भएमा आगामी ८ महिनाको वस्तु तथा सेवाको आयात धान्न सकिने छ।
आर्थिक वर्षको पहिलो महिना रेमिट्यान्स १२.५ प्रतिशतले बढेको छ। गत वर्षको साउनको तुलनामा यो वर्षको साउनमा ७२ करोडऊ ४० लाख अमेरिकी डलर रेमिट्यान्स भित्रिएको छ। गत वर्षको साउनमा रेमिट्यान्स घट्दो ट्रेन्डमा थियो। नेपाली रुपैयाँमा भने रेमिट्यान्स २०.३ प्रतिशतले बढेको छ।
त्यस्तै साउनमा आयात १२ प्रतिशतले घटेको छ। एकातिर आयातमा कमी अर्कोतिर रेमिट्यान्समा वृद्धि, सेवा खाता घाटमा सुधार हुँदा पनि मुलुकको शोधानान्तर २२ अर्ब ६३ करोडले घाटँमा रहेको छ। यद्यपि यो अघिल्लो वर्षको तुलनामा न्यून हो। गत वर्ष शोधानान्तरण स्थिति ३८ अर्बले घाटामा थियो।
साउनमा चालु खाता १६ अर्ब २६ करोडले घाटामा रहेको छ। अघिल्लो वर्षको यही अवधिमा ४७ अर्बले घाटामा थियो।
साउनमा वार्षिक बिन्दुगत मूल्यवृद्धि ८.२६ प्रतिशत पुगेको छ। पछिल्ला महिनाहरुमा मूल्यवृद्धि निरन्तर उकालो लाग्दै आएको छ। गत वर्षको साउनमा यस्तो मूल्यवृद्धि ४.३५ प्रतिशत थियो।
