काठमाडौं- चीनतर्फबाट विभिन्न समय बन्द हुँदै खुलाउँदै गरिएको तातोपानी नाका चीनिया नेता ली झान्शुको नेपाल भ्रमणको दुई दिनअघि शनिबारदेखि खुला भएको छ। कोरोना माहामारी भएको भन्दै चीनले पछिल्लो समय साउन २२ गतेदेखि नाका बन्द गरेको थियो।
गएको शनिबारबाट आंशिक रुपमा खुला गरिएको नाकामा सोमबार चीनबाट विभिन्न सामाग्री बोकेर आएका कन्टेनर सिन्धुपाल्चोकको नाकाबाट नेपाल भित्रिए। दसैँको समयमा नेपाली व्यापारीले सीमा नाकामा रोकिएका कन्टेनर भित्र्याउन पहल गरिदिन नेपाल सरकारलाई अनुरोध गरिरहेका थिए।
व्यापारीहरूले अनुरोध गरेपछि नै सरकारले तातोपानी नाका खोलिदिन काठमाडौंस्थिति चिनियाँ दूतावासलाई पत्र पठाएको थियो। लगातारको आग्रहमा पनि नखोलिएको नाका चीनको तेस्रो वरीयतामा रहेका नेता ली झान्शुको नेपाल भ्रमणको समयमा खुला गरिएको हो।
चीनको राष्ट्रिय जनकंग्रेसका अध्यक्ष ली विशेष विमानबाट सोमबार अपराह्न काठमाडौं आएका हुन्। लीले भदौ ३० गतेसम्म चार दिनको समय नेपाल भ्रमणमा बिताउने छन्। उनी फर्किएलगत्तै तातोपानी नाकाको अवस्था फेरि उही हुने अनुमान गरिएको छ। अहिले केही दिनलाई तातोपानी नाका खोलिएको भए पनि रसुवा नाका अझै बन्द नै छ।
