सिन्धुली- सुक्खा पहिरोका कारण अवरुद्ध मध्यपहाडी राजमार्ग एकतर्फीरूपमा सञ्चालनमा आएको छ। खुर्कोट-घुर्मी सडकखण्ड अन्तर्गत सिन्धुलीको गोलञ्जोर गाउँपालिका-१ कुडुलेमा सुक्खा पहिरो खसेका कारण सवारी आवागमन अवरुद्ध भएको थियो।
जिल्ला प्रहरी कार्यालय सिन्धुलीका प्रहरी नायव उपरीक्षक हरिकृष्ण केसीका अनुसार अवरुद्ध राजमार्ग आजदेखि एकतर्फीरूपमा सञ्चालनमा आएको हो। उक्त स्थानमा मंगलबार दिउँसोदेखि सुक्खा पहिरो खस्न सुरु गरेको थियो।
पहिरो पूर्णरुपमा पन्छाउन सकिने अवस्थामा नरहेको र सडकको छेउको केही भागबाट सवारी एकतर्फीरूपमा सञ्चालन गरी सवारीसाधनलाई गन्तव्यतर्फ पठाउने काम भइरहेको उनले जानकारी दिए।
सो स्थलमा प्रहरी टोली परिचालन गरी डोजरले पहिरोको केही भाग पन्छाई राजमार्ग सञ्चालन गरिएको उनले जानकारी दिए। डोजरले पूरै पहिरो पन्छाउन नसक्दा दुईतर्फनै सवारी सञ्चालनगर्न कठिनाइ भएको र स्काभेटरले मात्र उक्त पहिरो पन्छाउन सक्ने भएकाले पहल सुरु गरिएको उनले बताए।
सडकमा ठूला-ठूला ढुंगा माथिबाट खसेका कारण डोजरले पन्छाउन नसकेको हो। खुर्कोट-घुर्मी सडकखण्डमा एक दर्जनभन्दा बढी स्थानमा सुक्खा पहिरो खसेको छ। उक्त सडक खण्डमा एक वर्ष देखि खसेको पहिरो पन्छाउने काम नहुँदा राजमार्गमा सवारीसाधन सहजै आवागमन गर्न पाएका छैनन्।
सडकको पहिरो पन्छाउन नसक्दा सिन्धुली, उदयपुर, ओखलढुंगा, खोटाङ, सोलुखुम्बुलगायत पूर्वी पहाडी जिल्लाका यात्रुले यात्रामा कठिनाइ भोग्नुपरेको छ। रासस
