काठमाडौं-  शेर्पा आउटडोरको नेपाली ब्रान्ड केटीएम सिटीले भारतमा बजार विस्तार गरेको छ। 

नेपालमा लुगा उत्पादन गर्दै आएको केटीएम सिटीले भारतको सिलगुरीममा नयाँ आउटलेट खोलेको हो । भारतको सिलगुरीस्थित होमल्याण्ड बिजनेश सेन्टरमा  केटीएम सीटीको आउटलेट खुलेको हो। 

यसअघि भारतको विभिन्न ६ स्थानमा आउटलेट सञ्चालन गरेर व्यवसाय गर्दै आएको केटीएम सिटीले सिलगुरीमा पनि सेवा विस्तार गरेको हो । भारतको राजधानी नयाँ दिल्लीको व्यापारिक महलमा आउटलेट खोल्ने योजना रहेको कम्पनीले जानकारी दिएको छ। 

‘केटीएम सिटीले गुणस्तरीय लुगामा देशलाई आत्मनिर्भर मात्र बनाएको छैन । अन्तराष्ट्रिय बजारमा नेपाली ब्रान्डको रुपमा आफूलाई स्थापित समेत गर्न खोजिरहेको छ । भारतीय बजारमा केटीएम सिटीले राम्रो सफलता प्राप्त गर्ने विश्वास हामीले लिएका छौं’ कम्पनीले जारी गरेको विज्ञप्तिमा उल्लेख गरिएको छ। 

 कम्पनीले नेपाली ब्रान्डलाई अन्तर्राष्ट्रिय बजारमा पनि विस्तार गर्न सकिन्छ भन्ने आत्मविश्वास पलाएको उल्लेख गरेको छ। यसबाट नेपालमा रोजगारी बढ्ने तथा देशको विश्वसनीयतामै पनि अभिवृद्धि हुने कम्पनीको विश्वास छ।