काठमाडौं- एटीएम बुथ फोडेर रकम चोरी हुने घटना बढेको भन्दै एटीएम मेसिन सुरक्षित राख्न प्रहरी प्रधान कार्यालयले ७७ वटै जिल्ला प्रहरी कार्यालयलाई परिपत्र गरेको छ।
एटीएम मेसिन फोडेर चोरी हुने क्रम बढेको भन्दै आफू मातहत तथा आफ्नो क्षेत्रको एटीएम बुथलाई सुरक्षित राख्न भन्दै हेडक्वाटरले परिपत्र गरेको हो।
यस सम्बन्धमा सम्बन्धित प्रहरी कार्यालयले बैंक तथा बैंकका शाखाहरुसँग समेत समन्वय गरेर काम गर्न निर्देशन दिइएको छ।
कास्कीमा साउन ३ गते एकै दिन एनएमबी र एनआईसी एसिया बैंकका एटीएम बुथ फोडेर रकम चोरी भएको थियो। उक्त घटनामा एटीएम मेसिन भेण्डरको प्रतिवेदनमा एनएमबी बैंकको एटीएम मेसिनको चाबी पूर्ण रुपमा बन्दसमेत नभएको उल्लेख गरिएको थियो। त्यसपछि प्रहरी हेडक्वाटरले एटीएम बुथ सुरक्षार्थका लागि देशभरका प्रहरी कार्यालयलाई परिपत्र गरेको हो।
