काठमाडौं- बंगलादेशका प्रधानमन्त्री शेख हसिनाले दुईवटा बन्दरगाहको उपयोगबाट नेपालले लाभ लिनसक्ने बताएकी छन्।
नेपालबाट गएको संसदीय समितिको प्रतिनिधि मण्डलसँगको भेटमा हसिनाले नेपालले मोंगला र छत्तोग्राम बन्दरगाह उपयोग गर्नसक्ने बताएकी हुन्।
संसदको अन्तर्राष्ट्रिय सम्बन्ध समितिका सभापति पवित्रा निरौलाको नेतृत्वमा गएको प्रतिनिधिमण्डलसँगको भेटमा उनले अन्तर्राष्ट्रिय व्यापारमा नेपालले बंगाली पोर्टको उपयोगबाट लाभ लिनसक्ने बताएकी हुन्।
उक्त भेटमा हसिनाले क्षेत्रीय उडान सञ्जाल विस्तार गर्नका लागि हाल सहिदपुर क्षेत्रीय विमानस्थल निर्माण भइरहेको र यसबाट पनि नेपालले लाभ लिनसक्ने बताएको दी डेलीस्टारले उल्लेख गरेको छ।
नेपालसहितका छिमेकी मुलुकसँगको सम्बन्ध बलियो बनाउन आफ्नो सरकार कटिबद्ध रहेको उक्त भेटमा हसिनाले बताएकी थिइन्।
