काठमाडौं- माथिल्लो मर्स्याङ्दी-२ जलविद्युत आयोजनाको सर्वेक्षण अनुमति हिमताल हाइड्रोपावर कम्पनी लिमिटेडले पाएको छ।
सोमबार सम्पन्न लगानी बोर्डको ५२ औँ बैठकले उक्त कम्पनीलाई सर्वेक्षण अनुमति दिने निर्णय गरेको हो।
यही कम्पनीले माथिल्लो मर्स्याङ्दी आयोजना पनि पाएको छ। ६ सय मेगावाट क्षमताको आयोजना पाएको कम्पनीले अर्को आयोजनाको सर्वेक्षण अनुमति पनि पाएको हो।
सोमबार सिंहदरबारमा बसेको बोर्डको बैठकले जलविद्युत आयोजना सम्बन्धी अरु निर्णय पनि गरेको छ। क्षमताको पश्चिम सेती र ४५० मेगावाट क्षमताको सेती नदी -६ संयुक्त जलविद्युत परियोजनाको विकासको लागि अध्ययन गर्न विकासकर्ता कम्पनी एनएचपीसी लिमिटेडसँग गरिने एमओयू स्वीकृत गरेको छ।
६७९ मेगावाट क्षमताको तल्लो अरुण जलविद्युत परियोजनाको लगानी स्वीकृति तथा परियोजना विकास सम्झौताको सम्बन्धमा आवश्यक तयारी अगाडि बढाउन लगानी बोर्डको कार्यालयलाई स्वीकृत दिने निर्णय पनि बैठकले गरेको छ।
