काठमाडौं- प्रदेश सरकार स्थापनापछि पहिलो पटक मधेस प्रदेशको औद्योगिक सम्मेलन आयोजना गरिएको छ। आर्थिक वृद्धि एवं लगानीको विषयलाई केन्द्रित गरी मधेस प्रदेशमा औद्योगिक सम्मेलन आयोजना गरिएको हो।

मधेस प्रदेश सरकार, नेपाल उद्योग परिसंघ र यूकेएड सीप परियोजनाको संयुक्त आयोजनामा औद्योगिक सम्मेलन आयोजना गरिएको हो। सम्मेलनमा नेपाल उद्योग परिसंघले बारा-पर्सा उद्योग संघ गठन गरेको घोषणा गर्यो। संघको अध्यक्ष विरेन्द्र संघाई रहेका छन्। 

परिसंघले संगठन विस्तार गर्ने क्रममा बारा-पर्सा उद्योग संघ गठन गरेको हो।  

बाराको सिमरामा आयोजित औद्योगिक सम्मेलनको उद्घाटन गर्दै मुख्यमन्त्री लालबाबु राउतले उद्योगमैत्री वातावरण नै प्रदेशको समृद्धिको मुल आधार भएको बताए। उद्योगमैत्री वातावरण बिना प्रदेश वा देशको समृद्धिको परिकल्पना गर्न नसकिने उनले बताए।  

उद्योगहरूको स्थापना देखी संचालनसम्म उत्पन्न विभिन्न समस्यालाई समाधान गर्न प्रदेश सरकार एकद्वार प्रणालीमार्फत अघि बढेको भन्दै उनले विरंगंजमा उद्योग विभाग स्थापनाको निर्णय सरकारले गरेको जानकारी गराए। उनले प्रदेशमा रोजगारी बढाउन उद्योगीहरूलाई आग्रह गरे। 

सम्मेलनमा नेपाल उद्योग परिसंघका निवर्तमान अध्यक्ष सतिशकुमार मोरले मधेस प्रदेशका उद्योगीले अन्य प्रदेशमा बिजुली उत्पादन गरेर मधेस प्रदेशमा ल्याउन सक्ने बताए। त्यसका लागि पावर ह्लीङलगायतको व्यवस्था आवश्यक पर्ने उनले बताए। उनले अन्य प्रदेशका विद्युत उत्पादकसँग मधेस प्रदेशका उद्योगहरूले सोझै विद्युत खरिद गर्न पाउने गरी व्यवस्था मिलाउन उनले आग्रह गरे।  

यस्तै परिसंघका उपाध्यक्ष राजेश अग्रवालले समृद्धिका लागि निजी क्षेत्रसँग निरन्तर वार्ता, छलफल आवश्यक पर्ने बताए। लगानीकर्तालाई लगानी ल्याउने, विस्तार गर्ने वातावरणमा सहजिकरण आवश्यक पर्ने भन्दै उनले निजी क्षेत्रलाई नयाँ कानून र नियमावलीको बारेमा जानकारी गराउनुपर्ने बताए। 

यस्तै परिसंघका उपाध्यक्ष विरेन्द्रराज पाण्डेले पूर्वाधार विकासको महत्वपूर्ण आधार भएकाले पूर्वाधार क्षेत्रमा लगानीको आवश्यकता, नीतिगतलगायत सुधारका लागि सरकार एवं सम्बन्धित पक्षको ध्यानाकर्षण गराउन परिसंघले नेपाल पूर्वाधार सम्मेलन आयोजना गर्दै आइरहेको बताए। उनले आगामी भदौ २३ र २४ गते चौथो नेपाल पूर्वाधार सम्मेलन हुने जानकारी गराउँदै उक्त सम्मेलनमा भाग लिन मधेस प्रदेश सरकारसहित उद्योगी व्यवसायीहरूलाई आग्रह गरे।  

सम्मेलन उद्घाटनमा नेपालका लागी बेलायती राजदूत निकोला पोलिटले मधेस प्रदेशमा ठूलो आर्थिक सम्भावना रहेको बताए। यो सम्मेलन सार्वजनिक निजी संवाद र सहयोगको लागि महत्वपूर्ण प्लेटफर्म भएको उनको भनाइ थियो।