दमौली- तनहुँमा एक वर्षमा पाँच सय ७९ उद्योग दर्ता भएका छन्। घरेलु तथा साना उद्योग कार्यालय तनहुँमा आर्थिक वर्ष २०७८/७९ को अवधिमा पाँच सय ७९ उद्योग दर्ता भएका हुन्। 

यस अवधिमा उत्पादनमूलक ४७, कृषि तथा वन पैदावरमा आधारित तीन सय २०, खनिजतर्फ एक, पर्यटनतर्फ एक, सेवातर्फ एक सय तीन र पूर्वाधारतर्फ तीन उद्योग थपिएको कार्यालय प्रमुख नारायण ढकालले जानकारी दिए। थपिएका उद्योगमध्ये घरेलुतर्फ ३३ र साना उद्योगतर्फ पाँच सय ४६ छन्। 

कृषि र पशुपालनमा युवाको आकर्षण बढेसँगै कृषिसम्बन्धी उद्योग दर्ता वृद्धि भएको कार्यालय ढकालले बताए। 'वैदेशिक रोजगारीबाट फर्किएका युवाहरु पशुपालनतर्फ आकर्षित भएका छन्,' उनले भने, 'यसले गर्दा कृषि तथा वन पैदावरमा आधारित उद्योग दर्ता बढेको छ।' कृषि तथा वनजन्यतर्फ दुग्ध डेरी, गाईपालन, बाख्रापालन, कुखुरापालन, मौरीपालन, माछापालन, तरकारी खेती तर्फ आकर्षण बढ्दो छ।

तनहुँमा थपिएका उद्योगको कुल पुँजी ६३ करोड ५२ लाख ५४२ हजार रहेको कार्यालयले जनाएको छ। ती उद्योगको वार्षिक उत्पादन क्षमता एक अर्ब ७१ करोड ८७ लाख ५० हजार रहेको छ। 

थपिएका उद्योगमा एक हजार ३५ ले रोजगारी पाएका छन्। त्यसमध्ये पाँच सय ३४ महिला र पाँच सय एक पुरुष छन्। उद्योगमा आठ सय नौ उद्यमी छन्। उद्योग दर्ता बापत २४ लाख तीन हजार चार सय रुपैयाँ राजस्व संकलन भएको छ। 

सोही अवधिमा तीन सय ९६ उद्योग नवीकरण भएका छन् भने ५४ उद्योगले नामसारी÷नाम परिवर्तन गरेका छन्। चार उद्योगले ठाउँसारी गरेका छन् भने ७७ उद्योगले उद्देश्य थप गरेका छन्। त्यस्तै ६७ उद्योग पुँजी वृद्धि गरेको कार्यालयले जनाएको छ। 

गत आर्थिक वर्ष ०७८/७८ मा जिल्लामा दुई हजार एक उद्योग दर्ता भएको थियो। उक्त आर्थिक वर्ष दर्ता भएका उद्योगमा दुई अर्ब ७० करोड ९० लाख लगानी भएको थियो। 

त्यस्तै आर्थिक वर्ष ०७६/७७ मा जिल्लामा तीन हजार पाँच सय १५ उद्योग थपिएको थियो। ती उद्योगमा एक अर्ब ८९ करोड ५२ लाख ६० हजार छ सय ५९ लगानी भएको थियो। 

१ लाखसम्म पुँजी भएको उद्योगले १ हजार १ सय, ३ लाखसम्म पुँजी भएको उद्योगले ३ हजार १ सय, ५ लाखसम्म पुँजी भएको उद्योगले ६ हजार १ सय, रु ५० लाखसम्म पुँजी भएको उद्योगले १२ हजार १ सय, १ करोडसम्म पुँजी भएको उद्योगले २० हजार १ सय, ५ करोडसम्म पुँजी भएको उद्योगले ३० हजार १ सय र ५ करोडभन्दा माथि पुँजी भएको उद्योगले ५० हजार १ सय १० दर्ता बापत शुल्क बुझाउनुपर्छ। रासस