काठमाडौं- बजेट निर्माणमा अनधिकृत व्यक्तिलाई प्रवेश गराएको आरोप लागेका पूर्वअर्थमन्त्री जनार्दन शर्मामाथि छानबीन गर्न बनेको संसदीय छानबीन समितिको म्याद सात दिन थप भएको छ।
बजेट निर्माण गर्दा तत्कालीन अर्थमन्त्री शर्माले अनधिकृत व्यक्तिलाई प्रवेश गराइ करका दर हेरफेर गरेको आरोप लागेपछि संसदीय छानबीन समिति बनेको थियो।
गत असार २२ मा बनेको समितिको म्याद १० दिन दिइएको थियो। उक्त समितिको म्याद बिहीबार सकिएको थियो। सभामुख अग्निप्रसाद सापकोटाले उक्त छानबीन समितिको म्याद सात दिन थपेको जनाएका छन्।
आधार र प्रमाणसहित उक्त विषयबारे निष्कर्षमा पुग्न र प्रतिवेदन पेश गर्न आवश्यक समय थप गर्न लेखिआएको भन्दै सभामुख सापकोटाले म्याद थप गर्न प्रतिनिधि सभामा सहमति जनाउन अनुरोध गरेका थिए। सांसदहरूको सहमतिसँगै म्याद थप भएको हो।
