काठमाडौं- भारतमा सबैभन्दा धेरै बिक्री हुने कारमा पर्छ इन्ट्रिलेवल अल्टो ह्याचब्याक कार। भारतमा अहिले पनि इन्ट्रिलेवल ह्याचब्याक कारको माग तथा बजार ठूलै छ।
यसैलाई मध्यनजर गर्दै भारतमा २०२० अप्रिलदेखि बीएस ६ लागु भएसँगै उत्पादन बन्द भएको अल्टो के १० नयाँ रुपमा पुनः उत्पादन हुने भएको छ। जापानी कम्पनीको सुजुकी मोटरको संयुक्त पउक्रम मारुती सुजुकी इन्डियाले अल्टो के १० लाई नयाँ रुपमा उत्पादन गर्न लागेको हो।
भारतमा पछिल्लो समय अटोमोबाइल बजार एसयूभीतर्फ मोडिँदै गएपनि ह्याचब्याक सेगमेन्टका कारको माग अझै पनि ठूलै संख्यामा रहेको छ। यही कुरालाई आधार मानेर मारुती सुजुकीले अल्टो के १० को पुनरुत्पादन गर्न लागेको जनाएको छ।
सुजुकीले पुनरुत्पादन गर्न लागेको के १० को नयाँ भर्सनको कोड नेम वाई जिरो एम राखिएको छ। इन्ट्रिलेवल ह्याचब्याक सेगमेन्टमा अहिले पनि प्रतिस्पर्धी निकै कम रहेकाले नै सुजुकीले भारतमा पुनः सो कार उत्पादन गर्न लागेको हो।
रेनो क्वीड, सुजुकीकै एसप्रेसो जस्तै १ हजार सीसी इन्जिन क्षमताका कारका लागि वास्तविक प्रतिस्पर्धी अहिले पनि नभएको भन्दै उक्त सेगमेन्टका लागि अल्टो के १० कै नयाँ रुप आवश्यक भएको निष्कर्षमा सुजुकी पुगेको हो। भारतमा अहिले पनि साना कारको बजार हिस्सा ७.८ प्रतिशत रहेको छ। यो ‘स्पेस’ नयाँ साना कार ल्याउनका लागि उपयुक्त नै रहेको विज्ञहरूले समेत बताएका छन्।
गएको आर्थिक वर्षमा मारुती सुजुकीले भारतमा २ लाख ११ हजार ७ सय ६२ वटा अल्टो र एसप्रेसो बेचेको तथ्यांक छ। यो इन्ट्रिलेवलका लागि पर्याप्त बजार छ भन्ने प्रमाणसमेत हो। गएको दुई दशकमा मारुती सुजुकीले ४३ लाखभन्दा बढी अल्टो बिक्री गरेको थियो। २०१० मा अल्टो के१० दुई इन्जिन अप्सनमा ९९८ सीसी क्षमतासहित ३ सिलिन्डर पेट्रोल इन्जिनमा आएको थियो।
उत्पादन बन्द हुनुअघि मारुतीले अल्टो के१० मात्र ८ लाख ८० हजार वटा बिक्री गरेको थियो। सबैभन्दा धेरै बिक्री भएको मारुती ८०० को अपग्रेडेड भर्सन अल्टो ८०० र अल्टो के१० हो।
नेपाली बजारमा पनि मारुती सुजुकीको मारुती ८०० देखि अल्टो हुँदै अल्टो के १० सम्म निकै लोकप्रिय कारका रुपमा रहेको छ। सुरुवाती समयमा मारुती ८०० कारकै रुपमा बिक्र भएका थिए। त्यसपछि २०४८ सालमा सरकारले ८ सय सीसीसम्म इन्जिन क्षमताका गाडीलाई ट्याक्सीमा दर्ता गर्न पाइने निर्णय गरेको थियो। जसले केही वर्षअघिसम्म ट्याक्सीमा एकछत्र उपस्थिति जनाएको थियो। अहिलेपनि नेपाली सडकमा गुड्ने दुई तिहाइभन्दा बढी ट्याक्सी मारुती ८०० र अल्टो ८०० नै छन्।
ट्याक्सीको मापदण्ड बदलिएको र बागमती प्रेदश सरकारले ट्याक्सीमा विद्युतीय सवारी नै दर्ता गर्नुपर्ने नियम ल्याएकाले अब अल्टो के १० कारका रुपमा मात्र गुड्ने छन्। अहिले पनि धेरै मानिसको रोजाइमा अल्टो के १० पर्ने गरेको छ। इन्ट्रिलेवलका कार किन्ने र इन्धन किफायती कार खोज्नेका लागि तुलनात्मक रुपमा सस्तो मूल्यमा यही कार रहेको छ। भारतमा उत्पादन बन्द भएपनि यो कार नेपाल आएको छैन।
भारतमा नयाँ भर्सनमा अल्टो के १० आउन लागेकाले उक्त कार नेपालमा समेत आउने छ। हजारौँ अल्टो प्रयोगकर्ता नेपालीको रोजाइमा नयाँ कार पनि पक्कै पर्नेछ।
