काठमाडौं- भौतिक पूर्वाधार तथा यातायातमन्त्री देवेन्द्र दाहालले पूर्वाधार निर्माणसँगै बेरुजु फर्स्याैट र रुग्णठेक्का व्यवस्थापनलाई पहिलो प्राथमिकतामा राख्न कर्मचारीहरुलाई निर्देशन दिएका छन्।

बुधबार र बिहिबार चलेको सडक विभागको गत आर्थिक वर्षको कार्यसम्पादनको समिक्षा कार्यक्रमको समापन शत्रमा उनले कार्यसम्पादनका हरेक चरणमा आर्थिक सुशासन कायम गर्न निर्देशन दिएका हुन्।

गुणस्तरीय निर्माण कार्यलाई अघि बढाउन विभागअन्तर्गत रहेका प्रयोगशालाहरुको क्षमता विकास गरी पूर्ण रुपमा सञ्चालनको वातावरण बनाउन पनि उनले निर्देशन दिएका छन्।

पुल निर्माणको क्षेत्रमा देखिएका समस्यालाई मन्त्रालयले गम्भिर रुपमा लिएको भन्दै मन्त्री दाहालले समस्याग्रस्त पुलको निर्माण कार्य अघि बढाउन विशेष ध्यान दिन आवश्यक रहेको बताए। देश भरिमा निर्माण सुरुभइ अलपत्र परेका, ठेक्का लागेर पनि शुरु नभएका वा पूरा नभएका, त्रुटी देखिएका पुलहरुको समस्या लामो समयसम्म रहन नदिन उनले भनेका छन्।

राष्ट्रिय गौरवका आयोजना, राष्ट्रिय महत्वका योजना, रुपान्तरणकारी कार्यक्रम जस्ता विशेष महत्वका क्षेत्रमा श्रोत साधनको अभाव हुन नदिनेसमेत उनले प्रतिबद्धता जनाएका छन्। यस्तै उत्तर दक्षिण राजमार्ग, त्रिदेशीय करिडोर, राजश्व संकलनमा सहयोग पुग्ने संरचना, कृषि उपजको बजारीकरण लगायतमा सहयोग पुाग्ने आयोजना, योजनामा विशेष ध्यान दिने उनले बताए।

यस्तै मन्त्रालयका सचिव केशवकुमार शर्माले दशैं अघिनै देश भरिका सडक खाल्डारहित बनाउने काम अघि बढाउन विभागलाई आग्रह गरेका छन्। गत आर्थिक वर्षको पूँजीगत खर्चको नतिजाबाट उत्साही मात्र नभइ थप नतिजा आउने गरी काम गर्न निर्देशन दिए।

कार्यक्रममा उत्कृष्ट कार्यसम्पादन गर्ने विभिन्न कार्यालय, कार्यालय प्रमुख तथा निर्माण व्यवसायीलाई पुरस्कृत गरिएको थियो। दुई दिन सञ्चालन भएको कार्यक्रममा सडक विभाग अन्तर्गतका देश भरिका कार्यालय प्रमुख, दातृनिकायका प्रतिनिधी तथा सरोकार राख्ने अन्य कार्यालयका प्रतिनिधिनहरुको सहभागीता रहेको सडक विभागका महानिर्देशक डा. विजय जैसीले जानकारी दिए।