काठमाडौं- सिभिल बैंकको पछिल्लो आक्रामकता हेर्ने हो भने दोस्रो बजारमा सस्तोमा सेयर किन्ने अहिले नै अन्तिम अवसर हुन सक्छ। सिभिलको सेयर साताको पहिलो दिन आइतबार प्रतिकित्ता ६ रुपैयाँ ४० पैसा घटेर २३८.५० रुपैयाँ कायम भएको छ। पछिल्लो समय सञ्चालक समिति अध्यक्षको रुपमा प्रतापजंग पाण्डे भित्रिएपछि सिभिल बैंकले आन्तरिक सुधारका कामहरुले तिब्रता पाउनुको साथै व्यवसायिक आक्रमकता पनि बढाउँदै लगेको छ।

जसका कारण आगामी वर्ष बैंकले राम्रै नाफा कमाउने देखिएको छ। नाफा कमाउने र लाभांश बढाउनुको साथै कुनै ठूलो बैंकसँग मर्जरमा पनि जाने देखिएकोले अहिले सेयर खरिद गर्नेहरुका लागि नाफा गर्ने उपयुक्त अवसर हुन सक्छ।

सिभिल बैंकले ११औँ साधारणसभाबाट मर्ज वा एक्विजिसनमा जाने प्रस्ताव पारित गरिसकेको छ। जसका लागि सभाले सञ्चालक समितिलाई जिम्मा दिएपछि सञ्चालक समिति पनि यतिबेला सम्भावित मर्जमा जान सकिने बैंकको खोजीमा जुटेको छ। सिभिल बैंकको चर्चा विगतमा नबिल बैंकसँग पनि भएको थियो।

उक्त समयमा स्वाप रेसियोमा कुरा नमिलेपछि मर्जको बाँकी प्रक्रिया रोकिएको थियो। अहिले राष्ट्र बैंकको नीति नै बैंक तथा वित्तीय संस्थाको मर्जमा जानेलाई सहज बनाउने भएकोले अहिले सबैजसो बैंकहरू मर्जर वा एक्विजिसनमा जाने तयारीमा जुटेका छन्।

त्यसमध्ये एक बैंक हो सिभिल। पछिल्लो समय व्यापार र नाफाका हिसाबले समेत आक्रामक सिभिल बैंक मर्जमा जाने भएपछि लगानीकर्ताको चासोमा परेको छ। पछिल्ले ५२ हप्तामा बैंकको सेयर मूल्य अधिकतम ३१६ रुपैयाँ थियो भने न्यूनतम २१६ रुपैयाँमा कारोबार भएको थियो। 

सिभिल बैंकले गत आर्थिक वर्षको नाफाबाट ५.२६ प्रतिशत लाभांश दिने प्रस्तावसमेत पारित गरेको छ। ५ प्रतिशत बोनस सेयर र ०.२६ प्रतिशत कर प्रयोजनका लागि नगद लाभांश सेयर लगानीकर्ताले पाइसकेका छन्। 

सिभिलसँग कुन बैंक मर्जर वा एक्विजिसनमा जान्छ भन्ने चासो लगानीकर्तामा रहेको छ। सिभिल बैंकलाई मर्जर भाँडिएको हिमालयन बैंकको समेत प्रस्ताव आएको छ। सिभिलले निरन्तर अन्य बैंकसँग पनि छलफल गरिरहेको छ। सिभिलको हिमालयसँग मात्रै होइन एभरेष्ट बैंकदेखि एनबी बैंकसँग समेत छलफल भइरहेको छ। बैंकले चालु आर्थिक वर्ष भित्र नै उपयुक्त र सम्मानजन हैसियतमा मर्जमा जाने तयारी गरेको छ। 

नाफामा पनि उत्कृष्ट छलाङ 

सिभिल बैंकले नाफा कमाउने दरमा सबै बैंकलाई उछिनेको छ। सिभिल बैंकको नाफा ६ महिना अवधिमा गत वर्षको तुलनामा १४८.४२ प्रतिशले बढेको हो। यो नाफाको दर विवरण सार्वजनिक भएका २२ बैंकको भन्दा बढी हो। गत वर्षको ६ महिनमा २० करोड २८ लाख नाफा कमाएको बैंकले आर्थिक वर्ष २०७८/७९ को ६ महिनामा ५० करोड ४० लाख रुपैयाँ नाफा कमाएको छ। जुन नाफा गत वर्षको तुलनमा १४८.४२ प्रतिशतले बढी हो। बैंकले ६ महिनामा वितरण योग्य नाफा पनि सुधार गरेको छ।

बैंकले ६ महिनामा ९१ अर्ब ६९ करोड निक्षेप संकलन गर्दा ८३ अर्ब ४२ करोड कर्जा प्रवाह गरेको छ। बैंकको प्रतिसेयर आम्दानी ११.६६ रुपैयाँ पुगेको छ।