बाँके- सञ्चालकहरूको आन्तरिक विवादले नेपालगञ्जको धम्बोझीस्थित वाटर पार्कमा पर्यटन प्रबर्द्धनका गतिविधि रोकिएका छन्।

नेपालगञ्ज उपमहानगरपालिका-१ र १८ मा अवस्थित वाटर पार्क सञ्चालनको जिम्मा पाएको बोटे बोरा प्रालिका सञ्चालक बीचको विवादले विगत एक वर्षदेखि वाटर पार्कमा जलयात्रालगायत पर्यटन प्रबर्द्धनका गतिविधि ठप्प छन्।

काठमाडौं महानगरपालिका-२६ निवासी बोटे बोरा प्रालिका सञ्चालकबीचमा नेपालगञ्जको वाटरपार्कमा मोटरबोट डुंगा सञ्चालनका लागि ५०/५० प्रतिशत सेयर लगानीको सम्झौता भएको जनाइएको छ।

वाटरपार्कमा जलयात्राका लागि दुई थान मोटरबोट सञ्चालन हुँदै आएकामा सञ्चालकहरूबीचको आन्तरिक कलहले हाल एक थान मात्र मोटरबोट सञ्चालनमा छ। नेपालगञ्ज उपमहानगरपालिकाबाट वार्षिक २४ लाख रुपैयाँमा १० वर्षका लागि वाटरपार्क सञ्चालनको सम्झौता भएको छ।

नेपालगञ्ज उपमहानगरपालिकाका प्रमुख प्रशान्त विष्टले वाटरपार्कलाई आन्तरिक पर्यटकीय क्षेत्र बनाउन निजी क्षेत्रलाई सञ्चालनको जिम्मा दिएको बताए। सञ्चालकबीच असमझदारी सृजना भएको जानकारी आफूसँग आएको उल्लेख गर्दै उनले सञ्चालकबीचको विवादले ताललाई अस्तव्यस्त बनाउन नहुनेमा आफू सजग रहेको बताएका छन्। रासस