काठमाडौं- सरकारी स्वामित्वको नेपाल वायुसेवा निगमको आय घटेको छ। निगमको आय २०७९/०८० को तुलनामा २०८०/०८१ मा ११.६९ प्रतिशतले घटेको हो।

जहाज मर्मतमा भएको ढिलासुस्तीका कारण लामो समयमा जहाज ग्राउन्डेड हुँदा त्यसको असर आम्दानीमा परेको छ।

निगमको आय २०७९/०८० मा २३ अर्ब ३६ करोड रहेकोमा २०८०/०८१ मा २० अर्ब ६३ करोड रुपैयाँ रहेको छ।

यसैगरी निगमको खुद नोक्सानी २०८०/०८१ मा ६०.५० प्रतिशतले बढेको छ। 

आर्थिक वर्ष २०८०/०८१ मा मात्रै निगमको नोक्सानी १ अर्ब ४ करोड रुपैयाँ पुगेको छ। निगमले लिएको ऋणको किस्ता र ब्याजलाई सावाँमा परिवर्तन गरेकै कारण नोक्सानी कम भएको हो।