काठमाडौं- नेपालमा प्रोटोन सवारीसाधनको एकमात्र आधिकारिक वितरक जगदम्बा मोटर्स प्रालिले विद्युतीय सवारी प्रोटोन ईमास सेभेनका लागि आकर्षक फाइनान्स योजना सार्वजनिक गरेको छ।

अब ग्राहकहरूले मात्र ६० मिनेटभित्र फाइनान्स स्वीकृति पाउन सक्नेछन् र केवल ४.९९ प्रतिशत ब्याजदरमा सवारीसाधन किन्न सक्नेछन्, जुन नेपालकै अटोमोबाइल क्षेत्रमा पहिलोपटक भएको कम्पनीको दाबी छ।

यस योजनाले विद्युतीय सवारीलाई अझ सहज, सुलभ र किफायती बनाउँदै, प्रोटोन ईमास सेभेनको अपनत्वलाई जनस्तरसम्म पुर्‍याउने लक्ष्य कम्पनीले लिएको छ। जगदम्बा मोटर्सले आफ्नो ग्राहक-प्रथम नीतिअन्तर्गत यस्तो योजना ल्याएको हो।

जगदम्बा मोटर्सका वरिष्ठ उपाध्यक्ष राजु भेटवाल भन्छन्, 'नेपालमा विद्युतीय सवारीको अपनत्वलाई तीव्र बनाउन प्रतिबद्ध छौँ। वित्तीय पहुँचको बाधा हटाउने र सवारी सुलभ बनाउने हाम्रो मुख्य उद्देश्य हो। यस ६० मिनेटको फाइनान्स स्वीकृति योजना र ४.९९ प्रतिशत ब्याजदरले नेपाली उपभोक्ताहरूलाई सफा, सस्तो र सजिलो विद्युतीय सवारी रोज्न प्रेरणा दिनेछ।'

कम्पनीका अनुसार प्रोटोन ईमास सेभेनले पहिले नै आफ्नो प्रदर्शन, सुरक्षा र भविष्यमुखी डिजाइनका कारण लोकप्रियता कमाएको छ। यो नयाँ योजनासँगै प्रोटोन ईमास सेभेनको माग अझ बढ्ने अपेक्षा कम्पनीको छ।