काठमाडौं- नेपाल कम्युनिष्ट पार्टी (माओवादी केन्द्र) का सांसद माधव सापकोटाले सिद्धान्त र प्राथमिकतामा सामाजिक न्यायसहितको आर्थिक समृद्धिलाई जोड दिएका छन्। प्रतिनिधिसभाको बिहीबारको बैठकमा आर्थिक वर्ष २०८२/८३ का लागि विनियोजन गरिएको विधेयकमा सिद्धान्त र प्राथमिकता सम्बन्धबारे (कर प्रस्तावबाहेक) को छलफलका क्रममा सांसद सापकोटाले उक्त्त कुरा बताएका हुन्। 

समाजवादी अर्थव्यवस्था निर्माण गर्न त्यसका आधारशिला निर्माण र भुरण निर्माण गर्ने दिशातर्फ राज्य  प्रणाली जान नसकेको उनकाे टिप्पणी छ।

साथै प्रि-बजेट छलफलमा आर्थिक समृद्धि हासिल गर्ने उद्देश्य र ध्ययेसँगै सामाजिक न्यायको सिद्धान्तलाई बलियो रुपमा अघि बढ्न प्रभावकारी र ठोस कुरा नआएको सांसद सापकोटाले बताए।

‘सबै वर्ग, जाति, क्षेत्र, लिंग र समुदायलाई समन्यायिक ढंगले राज्यका सबै क्षेत्रमा समावेश गरेर लैजाने र त्यसअनुसार न्याय स्थापित गर्ने भनेका छौँ’, सांसद सापकोटाले भने, ‘पुँजीवादी अर्थतन्त्र व्यवस्थासँग जोडिएका कयौँ विषयले मात्र बढी प्राथमिकता पाएका छन।’ रासस