काठमाडौं- सन् २०२५ को तीन महिनामै त्रिभुवन अन्तर्राष्ट्रिय विमानस्थल हुँदै २२ लाख ६३ हजारभन्दा बढीले हवाई यात्रा गरेका छन्।

विमानस्थल कार्यालयका प्रमुख जगनाथ निरौलाका अनुसार जनवरी, फेब्रुअरी र मार्च महिनामा मात्रै त्रिभुवन अन्तर्राष्ट्रिय विमानस्थल हुँदै २२ लाख ६३ हजार ५ सय ६९ जनाले हवाई यात्रा गरेका हुन्।

तथ्यांकअनुसार याे तीन महिनामा आन्तरिकतर्फ भन्दा अन्तर्राष्ट्रियतर्फ हवाई सेवा लिने यात्रु बढी छन्।

याे अवधिमा आन्तरिक र अन्तर्राष्ट्रिय गरी २९ हजार ७ सय ५९ वटा उडान तथा अवतरण भएका छन्। जसमा अन्तर्राष्ट्रियतर्फ ७ हजार ४ सय ४३ वटा र आन्तरिकतर्फ २२ हजार ३ सय १६ वटा उडान तथा अवतरण भएका छन्।

अन्तर्राष्ट्रिय हवाई यात्रुमात्रै ११ लाख ८५ हजार

विमानस्थल कार्यालयका अनुसार सन् २०२५ को पहिलो ३ महिनामै ११ लाख ८५ हजार ९० जनाले अन्तर्राष्ट्रिय हवाई यात्रा गरेका छन्। जसमा नेपालबाट बाहिरिने हवाई यात्रुको संख्या ६ लाख ३ सय ६१ जना रहेको छ भने नेपाल भित्रिनेको संख्या ५ लाख ८४ हजार ७ सय २९ जना रहेको छ।

३ महिनामा ७ हजार ४ सय ४३ वटा उडान तथा अवतरण भएको विमानस्थल कार्यालयले जनाएको छ। जसमा ३ हजार ७ सय २२ वटा उडान र ३ हजार ७ सय २१ वटा अवतरण भएको छ।

विमानस्थल कार्यालयले दिएको तथ्यांकअनुसार जनवरीमा ३ लाख ८७ जार ३४ जना, फेब्रुअरीमा ३ लाख ७३ हजार ५ सय ३४ जना र मार्चमा ४ लाख २४ हजार ५ सय २२ जनाले अन्तर्राष्ट्रिय हवाई यात्रा गरेका छन्।

जनवरीमा नेपालबाट बाहिरिने यात्रुको संख्या १ लाख ९१ हजार ८ सय ३० रहेको थियो भने नेपाल भित्रिने यात्रुको संख्या १ लाख ९५ हजार २ सय ४ जना रहेको छ। 

फेब्रुअरीमा नेपालबाट बाहिरिने हवाई यात्रुको संख्या १ लाख ८७ हजार ९ सय १ रहेको थियो भने नेपाल भित्रिने यात्रुको संख्या १ लाख ८५ हजार ६ सय ३३ रहेको छ।

यसैगरी मार्चमा नेपालबाट बाहिरने अन्तर्राष्ट्रिय हवाई यात्रुको संख्या २ लाख २० हजार ६ सय ३० रहेको थियो भने नेपाल भित्रिने हवाई यात्रुको संख्या २ लाख ३ हजार ८ सय २९ रहेको छ। 

विमानस्थल कार्यलयका अनुसार जनवरीमा २ हजार ४ सय ५८, फेब्रुअरीमा २ हजार २ सय ७५ र मार्चमा २ हजार ७ सय १० वटा उडान तथा अवतरण भएको छ।

यसैगरी सन् २०२५ कै तीन महिना त्रिभुवन अन्तर्राष्ट्रिय विमानस्थल हुँदै ३ हजार ६ सय ५१ टन सामान नेपालबाट बाहिरिएको छ भने २ हजार ५ सय ८७ टन सामान नेपाल भित्रिएको छ।

आन्तरिकतर्फ १० लाख ७८ हजारले गरे हवाई यात्रा

त्रिभुवन अन्तर्राष्ट्रिय विमानस्थल हुँदै सन् २०२५ को ३ महिनामा १० लाख ७८ हजार ४ सय ७९ जनाले आन्तरिक हवाई यात्रा गरेका छन्। जसमा काठमाडौंबाट बाहिरिने हवाई यात्रुको संख्या ५ लाख ४८ हजार ३ सय ५७ र बाहिरबाट काठमाडौं भित्रिने हवाई यात्रुको संख्या ५ लाख ३० हजार १ सय १३ जना रहेको छ।

विमानस्थल कार्यालयका अनुसार जनवरीमा ३ लाख १२ हजार ९ सय २६ जना, फेब्रुअरीमा ३ लाख ५७ हजार ७ सय ६९ जना र मार्चमा ४ लाख ७ हजार ७ सय ७५ यात्रुले आन्तरिक हवाई यात्रा गरेका छन्।

यसैगरी तीन महिनामा आन्तरिकतर्फ ११ हजार १ सय ६५ टेकअफ र ११ हजार १ सय ५१ पटक जहाज ल्यान्ड भएका छन्। जसमा जनवरीमा ६ हजार ३ सय ३८, फेब्रुअरीमा ६ हजार ९ सय १४ र मार्चमा ९ हजार ६४ वटा टेकअफ तथा ल्यान्ड भएका छन्।

आन्तरिकतर्फ बुद्धको बजार हिस्सा ५८.३३ प्रतिशत

याे अवधिमा आन्तरिकतर्फ बुद्धले मात्र‌ै ६ लाख २९ हजार ५ सय जनालाई आन्तरिक हवाई सेवा दिएको छ। यो कुल आन्तरिक हवाई यात्रु संख्याको ५८.३३ प्रतिशत हो।

यसैगरी दोस्रो बढी यात्रु बोक्न एयरलाइन्य यती हो। यती एयरलाइन्सले ३ महिनामा २ लाख ३४ हजार १ सय ४७ जनालाई आन्तरिक हवाई सेवा दिएको छ। यो संख्या कुल आन्तरिक हवाई यात्रुको २१.७१ प्रतिशत हो।

यस्तै, तेस्रो बढी यात्रु बोक्ने एयर श्री एयरलाइन्स हो। श्रीले तीन महिनामा १ लाख ९६ हजार १६ जनालाई आन्तरिक हवाई सेवा दिएको छ। जुन कुल हवाई यात्रु संख्याको १८.१७ प्रतिशत हो।