काठमाडौं- लगातार उचाइतर्फ लागेर रेकर्ड बनाइरहेको सुनको मूल्यमा बुधबार भने भारी गिरावट आएको छ। बुधबार एकैदिन सुनको मूल्य तोलामा ७ हजार ५ सय रूपैयाँले घटेर प्रतितोला एक लाख ९० हजार ४ सय रूपैयाँ कायम भएको छ।

यो साता आइतबार स्थिर रहेर सोमबार र मंगलबार कीर्तिमानी बिन्दुमा पुगेको सुनको मूल्य बुधबार भने उच्च बिन्दुबाट ओरालो लागेको हो। सोमबार सुनको मूल्य एक लाख ९१ हजार रूपैयाँ थियो भने मंगलबार सुन तोलामा ६ हजार ९ सयले बढेर प्रतितोला एक लाख ९७ हजार ९ सय रूपैयाँमा कारोबार भएको थियो।

मंगलबार प्रतितोला १० रूपैयाँले बढेको चाँदीको मूल्य पनि बुधबार प्रतितोला ५ रूपैयाँले घटेको छ।

मंगलबार प्रतितोला एक हजार ९ सय ७० रूपैयाँमा कारोबार भएको चाँदीको मूल्य बुधबारका लागि प्रतितोला एक हजार ९ सय ६५ रूपैयाँ तोकिएको नेपाल सुनचाँदी व्यवसायी महासंघले जनाएको छ।