भक्तपुर- आगामी बैशाख १ गतेदेखि सुरु हुने ‘नगरकोट भ्रमण वर्ष-२०८२’ सफल पार्न तीन जिल्ला र चार नगरपालिकाका प्रमुख, राजनीतिक दलका प्रतिनिधि, उद्योगी एवं सरोकारवाला निकायले प्रतिबद्धता व्यक्त गरेका छन्।

चाँगुनारायण, मण्डनदेउपुर, बनेपा र शङ्खरापुर नगरपालिकाले नगरकोटमा आज संयुक्त रुपमा आयोजना गरेको भक्तपुर, काठमाडौं, काभ्रेपलाञ्चोकका तीन जिल्ला समन्वय समिति र नगरपालिकाको प्रमुख एवं प्रतिनिधिबीच भएको भ्रमण वर्षबारे छलफल कार्यक्रममा सहभागी प्रमुखहरुले भ्रमण वर्षलाई एक वर्षभरि नै भव्य बनाउने प्रतिबद्धता व्यक्त गर्दै नेपाल सरकारले नगरकोटलाई पर्यटकीय क्षेत्र घोषणा गर्नुपर्ने बताए।

कार्यक्रममा पूर्वप्रदेशसभा सदस्य राजु विष्टले नगरकोट भ्रमण वर्षले नगरकोटसँग जोडिएको तीन जिल्ला र चार नगरपालिकाको पर्यटन विकासमा ठूलो टेवा पुर्‍याउने बताए। उनले बौद्ध जोरपाटीबाट शङ्खरापुर , नगरकोट हुँदै धुलिखेलसम्म जाने सडक, नगरकोटबाट कात्तिके बजार जाने सडक मार्गबाट आन्तरिक पर्यटकको विकासमा यसले टेवा पुर्‍याउने बताए। शङ्खरापुर नगरपालिकाले भ्रमण वर्ष सफल पार्न समान साझेदारीसँगै विभिन्न कार्यक्रम आयोजना गर्ने बताए।

कार्यक्रममा बागमती प्रदेशसभाका पूर्वमन्त्री एवं प्रदेशसभा सदस्य कञ्चनवादे श्रेष्ठले नगरकोट मात्रै नभइ चारवटै पालिकाकाको पर्यटन विकास गर्न नगरकोट आवतजावत गर्ने ११ वटा नाका एवं सडकको प्रचार गर्नुपर्ने बताए। नगरकोट आउने पर्यटकको यात्रा र बसाइ लम्ब्याउन विभिन्न नयाँ कार्यक्रमसँगै नगरकोट-धुलिखेल साइकल मार्ग सञ्चालनमा ल्याउनुपर्ने औँल्याए।

जिल्ला समन्वय समितिका प्रमुखहरुका तर्फबाट दीपककुमार गौतमले विश्वमा नगरकोटको नामबाट चिनिने नगरकोट भ्रमण वर्ष सफल भएमात्रै नेपाल भ्रमण हुने बताउँदै नगरकोट आएका सडकदेखि विभिन्न चुनौतीलाई चिर्दै भ्रमण वर्ष सफल पार्न तीनवटै जिल्ला समन्वय समितिले भूमिका निर्वाह गर्ने बताए।

कार्यक्रममा प्रमुख जिल्ला अधिकारीहरुका तर्फबाट भक्तपुरका प्रमुख जिल्ला अधिकारी गोपालप्रसाद अर्यालले सामान्य परिवारदेखि मध्यम वर्गीय परिवारसम्म नगरकोट आएर बस्न सक्ने गरी प्याकेज सर्वजनिक गर्नुपर्ने भन्दै तीन तहका सरकारसँग समन्वय गर्दै भ्रमण वर्ष अगाडि बढाउनुपर्ने बताए।

नगरकोट आएर एक रात बस्छु भन्ने जोकोही नेपालीले सहजै बस्न र खान सक्ने गरी प्याकेज ल्याउन सकेमात्रै भ्रमण वर्षमा निम्न, मध्यम र उच्च वर्गका व्यक्तिको पारिवारिक भ्रमण राख्न सकिने उनले बताए। उनले नगरकोट भ्रमण वर्ष सफल पार्न तीनवटै जिल्लाका प्रमुखहरुले सुरक्षा व्यवस्थादेखि आवश्यक सहयोग गर्ने बताए।

चाँगुनारायणका नगर प्रमुख जीवन खत्रीले आउँदो बैशाख १ गते राष्ट्रपति रामचन्द्र पौडेलले उद्घाटन गरी ३ गतेसम्म नगरकोटमा भव्य रुपमा भ्रमण वर्षका विभिन्न कार्यक्रम आयोजना गरिने बताए। उनले नगरकोटलाई मुख्य पर्यटकीय विन्दु बनाएर आयोजना हुने नगरकोट भ्रमण वर्षले चाँगुनारायण, काठमाडौंको शङ्खरापुर, काभ्रेपलाञ्चोकको मण्डन देउपुर र बनेपा नगरपालिकाको समृद्धिको यात्रालाई जोडेर लैजाने बताए।

नगर प्रमुख खत्रीले भने, 'नगरकोट जाने सडक बिग्रिएको छ भनेर अल्झिने वा अलमलिने नगरौँ, हामी भक्तपुर-नगरकोट सडक सुधार गर्दैछौँ, साथै नगरकोट आउने भक्तपर, काठमाडौं र काभ्रेका अरू नाकाबाट पनि पर्यटक ल्याउन सकिने सडक छन्, सबै पालिकाले आफ्ना नगरपालिका क्षेत्रबाट नगरकोट पर्यटक भित्र्याउने काम गर्नेछौँ, नगरकोट केन्द्रविन्दु बनाएर १२ महिनामा मुख्य १२ वटा पर्यटक लक्षित कार्यक्रम हुनेछ, साथै अरू समयमा आ-आफ्नो नगरपालिका क्षेत्रमा पर्यटकीय गन्तव्य बनाएर कार्यक्रम गर्नेछौँ, ओझेलमा परेका पर्यटकीय गन्तव्यको पहिचान गर्नेछौँ।'

नगरकोट भ्रमण वर्षले तीन जिल्ला र चार नगरपालिकालाई समृृद्ध बनाउने उनले गरे। उनले भ्रमण वर्ष लक्षित गरेर प्रदेश र संघीय सरकारसँगको सहकार्यमा पूर्वाधार विकासको कामलाई अगाडि लैजाने, आव २०८३/८४ मा अझै धेरै सङ्ख्यामा पर्यटक भित्र्याउने, एक दिन हैन, पाँच दिन बस्ने पर्यटकको बसाइ लम्ब्याउने गरी दीर्घकालीन विकासका कार्य र गन्तव्य पहिल्याउने बताए।

उनले भने, 'नगरकोटलाई स्वदेशी तथा विदेशी पर्यटकको प्रस्थान विन्दु बनाएर भ्रमण वर्षको आयोजना गरेका छौँ।' विश्व सम्पदामा रहेको चाँगुनारायणदेखि नगरकोटसम्म र ताथलीसम्म वडा नं १ देखि ९ सम्मका प्रत्येक क्षेत्रलाई पर्यटकीय गन्तव्य बनाउने, त्यहाँका सम्पदालाई उजागर गर्ने, उत्पादन प्रदर्शन गर्ने, प्रत्येक महिनामा प्रत्येक वडामा छुट्टै महोत्सव गर्ने र अरू नगरपालिकाले पनि नगरकोटमा संयुक्त र आफ्ना नगरपालिका क्षेत्रमा पर्यटकीय गतिविधि गर्ने गरी तयारी गरेको बताए।

कार्यक्रममा बनेपा नगरपालिकाका प्रमुख शान्तिरत्न शाक्यले नगरकोट भ्रमण वर्ष सफल पार्न होटल र पर्यटन व्यवसायीले सकारात्मक भूमिका तथा सहयोग गर्नुपर्ने बताउँदै हिमाल र सूर्योदय सूर्यास्त हेर्न मात्रै होइन नगरकोटमा धेरै कुरा हेर्न र जान्न सकिन्छ भनेर पर्यटक ल्याउने आधार तयार पार्नुपर्ने बताए।

भ्रमण वर्षमा नगरकोट हुँदै कलमसी, दुलाल गाउँबाट काभ्रेसम्म ग्रामीण पर्यटनसँग पर्यटकलाई जोड्ने, पुरानो गढी, बनेपा गुम्बा, नगरकोट टावर, हिले जलजले तालदेखि अनगिन्ती पर्यटकीय क्षेत्रलाई पर्यटकीय गन्तव्यका रुपमा विकास गर्ने, बनेपाबाट २० मिनेटमा नगरकोट पुग्ने सडक कालोपत्र सुरु गरेको पनि बताए।

कार्यक्रममा मण्डनदेउपुर नगरपालिकाका प्रमुख टोकबहादुर वाइबाले नगरकोटको पहिचानलाई विश्वभर पुर्‍याउन भ्रमण वर्ष सफल हुने बताउँदै चार पालिकाको संगमस्थल नगरकोटको विकासमा चारवटै पालिकासँग जुटेर सबै पालिकामा यहाँका नयाँ पर्यटकीय गन्तव्यमा पर्यटक पुर्‍याउने बताए। होटल व्यवसायीले घोषणा गरेको १० प्रतिशत छुटको प्याकेज अपुग भएको भन्दै उनले नगरपालिका र बाग्मती प्रदेश सरकारको २८ करोड रूपैयाँको लागतमा नगरकोटलाई खानेपानीको व्यवस्था गरेको बताए।

उद्योग-व्यवसायी, नेपाली कांग्रेस, नेपाल कम्युनिष्ट पार्टी (एमाले), नेकपा (माओवादी केन्द्र), राष्ट्रिय स्वतन्त्र पार्टी, राप्रपा, नेमकिपालगायत पार्टीका नेताहरुले नगरकोट भ्रमण वर्ष सफल पार्न सबै निकायले सहयोगात्मक भूमिका निर्वाह गर्नुपर्ने बताए। रासस