पर्सा- वीरगञ्ज भन्सार कार्यालयले चालु आर्थिक वर्षको आठ महिनामा एक खर्ब ९ अर्ब २२ करोड ८५ लाख रूपैयाँ राजस्व संकलन गरेको छ।

उक्त अवधिमा एक खर्ब ३९ अर्ब ७३ करोड राजस्व संकलनको लक्ष्य लिइएको थियो। 

भन्सार प्रमुख भन्सार प्रशासक दीपक लामिछानेका अनुसार राजस्व संकलनमा क्रमशः सुधार भएको छ। चालु आव  बाँकी चार महिनामा राजस्व संकलनमा थप सुधार हुने उनको विश्वास छ।

अन्य क्षेत्रको तुलनामा यहाँ पेट्रोलियम पदार्थ र सवारीसाधनबाट राजस्व संकलन अधिक हुने गरेको छ। 

वीरगञ्ज भन्सारले चालु आवको साउनमा १२ अर्ब १५ करोड रूपैयाँ, भदौमा १३ अर्ब ४२ करोड, असोजमा १३ अर्ब ४७ करोड कात्तिकमा ११ अर्ब १० करोड र मङ्सिरमा भने १४ अर्ब ४० करोड रूपैयाँ राजस्व संकलन गरेको थियो।

यसैगरी, पुसमा चालु आवको सबैभन्दा धेरै अर्थात् १५ अर्ब ४७ करोड रूपैयाँ र माघमा १४ अर्ब ४४ करोड रूपैयाँ र फागुनमा १४ अर्ब ६३ करोड रूपैयाँ राजस्व असुली भएको थियो। रासस