काठमाडौं- विद्युतीय कार आयातमा करछली गरेको र सर्भिस तथा स्पेयर पार्ट्समा उपभोक्तासँग चर्को मूल्य असुल गरिरहेको बीवाईडी बिक्रेता साइमेक्स इंक प्रालिको कानूनी विवाद चर्किँदै गएको छ। साइमेक्स इंक प्रालि र सूर्य गुड्स सप्लायर्स प्रालि दुवै बीवाईडी अटो इन्डस्ट्री कम्पनीको नेपालका लागि आधिकारिक बिक्रेता रहेका छन्। 

केही समयअघि बीवाईडीको आधिकारिक बिक्रेता रहेको सूर्य गुड्स सप्लायर्सको सञ्चालकमा यमुना श्रेष्ठ र विशाल पण्डित रहेका छन्। यी दुई सञ्चालकबीच सुर्य गुड्स सप्लायर्सले आयात गरेको बीवाईडीको ई सिक्स गाडीको आधिकारिक बिक्रेता सूर्य गुड्स सप्लायर्स हुने कि साइमेक्स इंक हुने भन्ने विवाद अदालतसम्म पुगेको हो।

उच्च अदालत पाटनमा यमुना श्रेष्ठ र विशाल पण्डितले एकअर्कालाई मुद्दा हालेर व्यावसायिक दुष्टता साँधिरहेका छन्। सुरुमा सूर्य गुड्स सप्लायर्समार्फत आयात भइरहेको बीवाईडीका कार पछि साइमेक्स इंक प्रालिले आयात गर्न थाल्यो। आयातको विषयसँगै कम्पनीमा देखिएको विवाद अदालतसम्म पुगेको हो। 

व्यावसायिक मर्यादा भुलेर कम्पनीको बेमेलमा व्यक्तिगत तवरको झैझगडासमेत गरी दुई व्यवसायीले एकले अर्कालाई मुद्दा हालेका हुन्। यमुना श्रेष्ठले विशाल पण्डितविरुद्ध र विशाल पण्डितले यमुना श्रेष्ठविरुद्ध मुद्दा हालेर उच्च अदालत पुगेका छन्। तेस्रो मुद्दामा विशालले श्रेष्ठसहित अन्य दुईलाई समेत विपक्षी बनाएर अदालत पुगेका थिए। यी मुद्दा २०७९ साल असारयता उच्च अदालत पाटनमा चलिरहेको छ।

सूर्य गुड्स सप्लायर्समार्फत भइरहेको बीवाईडीको आयात साइमेक्स इंकमार्फत गर्न थालेसँगै यमुना श्रेष्ठले निष्क्रिय हुन थालेको सूर्य गुड्समा विशाल पण्डितलाई हटाएर आफ्नो एकलौटी हक हुनुपर्ने भन्दै २०७९ असार ३० गते उच्च अदालत पाटनमा पण्डितविरुद्ध मुद्दा हालेकी थिइन्।  

उक्त मुद्दामा २०७९ साउन २० गते चढेको पेशी हेर्न नभ्याइने भएको थियो भने २०७९ साउन २४ गते न्यायाधीशहरू दिपेन्द्रबहादुर बम र राजेन्द्र खरेलको इजलाशले कारण देखाउसँगै अन्तरिम आदेशका लागि छलफलमा झिकाउने आदेश जारी गरेको थियो। त्यसपछि २०७९ साउन २९ गतेको पेशीमा पनि न्यायाधीशहरू जनक पाण्डे र दिपेन्द्रबहादुर बमको इजलाशले छलफलमा झिकाउने आदेश दिएको थियो। 

२०७९ साउन २९ गते नै सूर्य गुड्सका साझेदार पण्डित पनि श्रेष्ठविरुद्ध मुद्दा लिएर उच्च अदालत गएका थिए। जसले गर्दा २०७९ भदौ ७ गतेको इजलाशमा न्यायाधीशहरू ऋषिराम दवाडी र महेश शर्मा पौडेलको इजलाशले दुवै मुद्दा साथै हेर्नेगरी लगाउमा राख्ने आदेश जारी गरेको थियो। त्यसपछि पनि विभिन्न समयमा अन्तरकालीन आदेश जारी हुने, प्रमाण मिसिल झिकाउने, प्रमाण बुझ्नेलगायत आदेशहरू जारी भएका थिए। 

यस्तोमा पण्डित पुनः २०७९ फागुन २९ गते उजुरीपत्र लिएर उच्च अदालत पुगे। जसमा उनले यमुना श्रेष्ठसँगै साइमेक्स इंकका अध्यक्ष अनिल श्रेष्ठ र ग्लोबल आईएमई बैंकको कुपण्डोल शाखालाई समेत विपक्षी बनाएका हुन्। 

उक्त मुद्दामा २०८० बैशाख १७ गते न्यायाधीशहरू राज्यलक्ष्मी बज्राचार्य र राजेन्द्र खरेलको इजलाशले यसअघिका दुईवटा मुद्दासँग साथै राखेर हेर्ने आदेश जारी गरेको थियो। यसपछि न्यायाधीशहरू राज्यलक्ष्मी बज्राचार्य र किरणकुमार पोखरेलको इजलाशले २०८० बैशाख २४ गते अन्तरिम आदेश जारी नहुने आदेश दिएको थियो। 

त्यसयता धेरै पटक उक्त मुद्दाको पेशी चढिसकेको छ। २०८१ असार ९ गते न्यायाधीश नृपध्वज निरौला र सुदर्शनराज पाण्डेको संयुक्त इजलासले दुई पक्षलाई मिलापत्रको लागि समय दिने आदेश दिएको थियो। मिलापत्रका लागि समय दिएयता नै १० पटक मुद्दाको पेशी तोकिइसकेको छ। यो १० पेशीमा ३ पटक हेर्न नमिल्ने, एक पटक हेर्न नभ्याइने, दुई पटक स्थगित र चार पटक विभिन्न आदेश भएको छ। पछिल्लो पटक २०८१ माघ २१ गतेको पेशीमा न्यायाधीश खडानन्द तिवारी र प्रकाश खरेलको संयुक्त इजलाशले बहस नोट माग्ने आदेश दिएको थियो।  

न्यायाधीश नृपध्वज निरौला र सुदर्शनराज पाण्डेको संयुक्त इजलासले मिलापत्र गर्न दिएको समयमा दुवै पक्षले मिलापत्र गर्न अस्वीकार गरेका छन्। यसले दुवै पक्षले यो मुद्दालाई प्रतिष्ठाको लडाइँको रुपमा लिएको प्रष्ट हुन्छ। 

मुद्दा नटुंगिएसम्म बीवाईडी आयात गर्न दिन नहुने माग ३१ महिनादेखि विचाराधीन 

सूर्य गुड्सका सञ्चालन विशाल पण्डितले साइमेक्स इंकमार्फत भइरहेको बीवाईडीको गाडी आयात मुद्दाको किनारा नलागेसम्म रोक्न लगाउन माग गर्दै मुद्दा दायर गरेका थिए। गाडी आयात रोक लगाउन माग गर्दै पण्डित २०७९ फागुन २९ गते उजुरीपत्र लिएर उच्च अदालत गएका थिए।। 

जसमा उनले सूर्य गुड्समा साझेदार रहेकी यमुना श्रेष्ठसँगै साइमेक्स इंक प्राइभेट लिमिटेड, साइमेक्समा साझेदार रहेका यमुनाका दाइ अनिल श्रेष्ठ र ग्लोबल आईएमई बैंकको कुपण्डोल शाखालाई पनि विपक्षी बनाएका हुन्। 

यसअघिको मुद्दामा भएको सबै विषय उल्लेख गर्दै उनले २०७५ साल साउन ९ गते सूर्य गुड्समार्फत बीवाईडीको गाडी ल्याइ बिक्री गर्नेगरी एजेन्सी दर्ताको प्रमाणपत्र प्राप्त गरेको जनाएका छन्।

त्यहीअनुरुप गाडी ल्याइ बिक्रीको काम गरिरहँदा यमुना श्रेष्ठले सूर्य गुड्सलाई बाइपास गर्दै अनिल श्रेष्ठसँग मिलेर पहिलेदेखि नै दर्ता रहेको साइमेक्स इंकमार्फत काम गर्न थालेको पण्डितले फिरादपत्रमा उल्लेख गरेका छन्। आफूलाई बीवाईडी आयात र बिक्रीका लागि भनेर कम्पनीको सेयर साझेदार बनाउने तर कम्पनीको हकहित र उद्देश्यविपरीत अन्य व्यक्तिसँग साँठगाँठ गरेर यमुना श्रेष्ठले आफूलाई हानी पुग्ने काम गरेको पण्डितको जिकिर छ। 

आफूले १ करोड ५० लाख रुपैयाँ बुझाएर साइमेक्ससँग बीवाईडीको ब्रान्ड लिएको तर काम भइरहँदा पनि कम्पनी निष्क्रिय बनाउनेतर्फ श्रेष्ठ लागेको आरोप पण्डितको छ। साइमेक्समा मिलेर मूल कम्पनी सूर्य गुड्सलाई हानी हुने काममा अनिल श्रेष्ठको सहयोग देखिएको आरोप पण्डितको छ।

सूर्य गुड्समार्फत आयात भइरहेको बीवाईडी गाडी झुक्यानमा पारेर अनिल श्रेष्ठ र यमुना श्रेष्ठ मिलेर साइमेक्समार्फत आयात र बिक्री गरिरहेको हुँदा मुद्दा नटुंगिएसम्म उक्त आयात र बिक्री गर्न दिन नहुने र साइमेक्सको समेत खाता रोक्का गर्नुपर्ने माग पण्डितको थियो। 

साथै आफूलाई जानकारीसमेत नदिइ यमुना श्रेष्ठले ग्लोबल आईएमई बैंकको कुपण्डोल शाखामा खाता खोलेर अनधिकृत रुपमा कम्पनीको कारोबार गरेकोसमेत पण्डितले जनाएका छन्। यसैले उनले ग्लोबल आईएमईलाई समेत विपक्षी बनाएका हुन्। त्यसमा बैंकसँग कुरा राख्दा आफू साझेदार हुनुभन्दा पहिलेकै विवरण राखेर काम गरेको देखिएको उनले जनाएका छन्। यसमा बैंकको समेत मिलीभगत रहेको पण्डितको आरोप छ। 

यस्तो छ यमुना श्रेष्ठले विशालविरुद्ध र विशाल पण्डितले यमुनाविरुद्ध दायर गरेको मुद्दाको विवरण 

यमुना श्रेष्ठले एकलौटी गरेको भन्दै विशाल पण्डित मुद्दामा

कम्पनी ऐन २०६३ को दफा १५९ को ९१० का आधारमा सेयरधनी सञ्चालक हकहितविरुद्धका सबै काम बदर गरी क्षतिपूर्तिसमेत माग गरेर पण्डित २०७९ साउन २९ गते उच्च अदालत गएका हुन्।   

श्रेष्ठसँगको चिनजानका आधारमा संयुक्त रुपमा सूर्य गुड्स सप्लायर्समा आधाआधा सेयर रहने गरी बाँडफाँट गर्ने र बीवाईडीको विद्युतीय गाडी ल्याइ बिक्री गर्ने भन्ने छलफल र सहमतिपछि आफू कम्पनीमा ५० प्रतिशत सेयर खरिद गरी जोडिएको पण्डितले उल्लेख गरेका छन्।

उनले विशेषगरी बीवाईडी अटो प्रडक्टको डिलरसिप इजाजत लिइ सूर्य गुड्स सप्लायर्सको संयुक्त खाता इन्भेष्टमेन्ट बैंकमा खोलेर दुवै सेयरधनीको संयुक्त हस्ताक्षरमा काम गर्दै आएको जनाएका छन्। त्यसका लागि आफूले बीवाईडीको गाडी नेपाल ल्याउनका लागि पटक पटक गरी १२ करोड रुपैयाँ संयुक्त खातामा जम्मा गरेको उल्लेख गरेका छन्। 

यसरी इन्भेष्टमेन्ट बैंकमा नै सवारी दर्ता किताब रहेको अवस्थामा सूर्य गुड्सको नाममा खरिद गरेको ६ वटा गाडीहरू बेचेर सबै रकम श्रेष्ठले एकलौटी गरेको आरोप पण्डितले लगाएका छन्। उक्त गाडीहरूको इन्भेष्टमेन्ट बैंकमा सूर्य गुड्स ऋणी भएकाले तिर्नुपर्न किस्तासमेत श्रेष्ठको हिनामिनाले नतिरिएको पण्डितले उल्लेख गरेका छन्। जसका कारण एउटा गाडी बैंकले नियन्त्रणमा राखेको उनले जनाएका छन्। 

यसैले समस्या देखिएपछि आफूले हरहिसाब मिलाउनका लागि इन्भेष्टमेन्टकै खातको चेकमा ५१ लाख ७५ हजार रुपैयाँको चेकमा दस्तखत गरी श्रेष्ठलाई दिएको तर उक्त रकम श्रेष्ठले र्‍यापिड सर्जिकल प्रालि नामको कम्पनीको खातामा जम्मा गरी आफूलाई झुक्यानमा पारेको पण्डितले उल्लेख गरेका छन। जसमा आफ्नो साथीको कम्पनीलाई सापटी दिएको र केही समय ब्याजसहित रकम फिर्ता हुने जवाफ श्रेष्ठले दिएको पण्डितले उल्लेख गरेका छन्। 

साझेदारी कम्पनीको नामको गाडीहरू सहमतिबिना बिक्री गरी रकम हिनामिना गरेको र खातामा रहेको रकममा समेत एकलौटी काम गर्दै काम गरेको आरोप पण्डितले श्रेष्ठमाथि लगाएका छन्। कम्पनीको आम्दानी र मुनाफाबाट आफूलाई बञ्चित गरिएको पण्डितको दाबी छ।  

श्रेष्ठले कम्पनीको गाडीको लगानी १२ करोड, मुनाफा २ करोड रुपैयाँ साथै एउटा गाडी परराष्ट्र मन्त्रालयलाई बिक्री गरी उक्त ६७ लाख ८५ हजार रुपैयाँ ग्लोबल आईएमई बैंक लगनखेल शाखामार्फत एकलौटी रुपमा झिकी अन्याय गरेको पण्डितले जनाएका छन्। 

कम्पनीमा ५० प्रतिशत सेयर भएको आफूलाई जानकारीसमेत नदिइ कम्पनीको रकम झिकेर खाएको, कम्पनीको गाडी बिक्री गरी रकम लिएको अवस्थामा हिसाबकिताब गरौँ भन्दा पनि आफूलाई अभद्र व्यवहार गर्दै गाडी आफ्नै भएको र बेच्न कसैलाई सोध्नु नपर्ने जवाफ श्रेष्ठले दिएको पण्डितले फिराद पत्रमा उल्लेख गरेका छन्। 

कम्पनीको सेयरधनीको हकहितविरुद्ध कम्पनीको कारोबार सञ्चालन भएको भन्दै पण्डितले आफूलाई भएको नोक्सानीको बिगो र बिगो बराबरको रकम श्रेष्ठले तिर्नुपर्ने माग राखेका छन्। 

विशषेगरी पण्डितले ६ थान गाडीको रकम, आफूलाई थाहा नदिइ प्रयोग भएको कम्पनीको १२ करोड रुपैयाँ र परराष्ट्रलाई बेचेको गाडीको ६७ लाख ८५ हजार रुपैयाँ र चेकमार्फत दिएको ५१ लाख ७५ हजार रुपैयाँमा लाग्ने हकका बारेमा उल्लेख गर्दै मुद्दा किनारा नलागेसम्म कम्पनीमार्फत बीवाईडीको खरिद बिक्रीमा रोक लगाउनुपर्ने माग गरेका छन्।  

विशाल पण्डितले कम्पनी बिगारेको यमुनाको दाबी

कम्पनीको सर्वसम्मत सम्झौताबमोजिम गराइ क्षतिपूर्तिसमेत माग गर्दै कम्पनीलाई क्रियाशील गराउन आवश्यक र उपर्युक्त आदेश जारी गरी पाउँ भनि यमुना श्रेष्ठ २०७९ असार ३० गते उच्च अदालत पाटनमा मुद्दामा गएकी थिइन्।  

विपक्षी विशाल पण्डितले कम्पनी ऐन, २०६३ को दफा १०४, १३९, १४०, १४५, १५९, १६०, १६१ एवं १६३ समेत उल्लंघन गरी आफू र आफूले स्थापना गरी हाल आफूसँग ५० प्रतिशत सेयर भएको सूर्य गुड्स सप्लायर्स कम्पनी लिमिटेडलाई अन्याय गरेको भन्दै श्रेष्ठले उजुरी निवेदनपत्र पेश गरेकी छिन्। 

कम्पनी दर्ता विवरणअनुसार २०६९ असोज २ गते स्थापना भएको सूर्य गुड्स सप्लायर्स कम्पनीमा विशाल पण्डितलाई व्यावसायिक साझेदार बनाएपछि समस्या सुरु भएको श्रेष्ठले दाबी गरेकी छिन्। 

जसमा २०७४ पुस १४ गते कुल १० हजार थान सेयरमध्ये दुवैले ५/५ हजार थान सेयर लगत कायम गरेर काम सुरु गरेका थिए। लगत्तै उनीहरूले कम्पनीको पुँजी वृद्धि गरी दुवैको ५०/५० प्रतिशत हुनेगरी दुवैले जनही ५० हजार कित्ता सेयर लिएका थिए। यो सबैमा उनीहरूले २०७४ पुस ४ गते नै दुईपक्षीय (एमओयू) सम्झौता गरेका थिए। जसको मुख्य विषय विद्युतीय गाडी आयात गरी व्यापारमा काम गर्ने भन्ने नै देखिएको छ। 

विद्युतीय गाडी आयात गर्न ब्रान्ड किन्नका लागि पण्डितले १ अर्ब ५० करोड रुपैयाँ जोहो गर्नुपर्ने भए पनि उक्त काम नगरेको आरोप श्रेष्ठले लगाएकी छिन्। पण्डितले कम्पनीमा अध्यक्ष भएको हैसियतमा गर्नुपर्ने आवश्यक अन्य काम नगरेको र आर्थिक दायित्वसमेत वहन नगरेको आरोप श्रेष्ठको छ। आफूले एकल रुपमा चलाउँदा राम्रोसँग चलिरहेको कम्पनी पण्डित भित्रिएसँगै भद्रगोल भएको आरोप श्रेष्ठले लगाएकी छिन्। 

यस्तोमा सूर्य गुड्सले साइमेक्स इंक प्रालिसँग विद्युतीय गाडी बीवाईडी खरिद गरी व्यापार गर्न नसकेको भन्दै सूर्य गुड्सबाट काम हुन नसकेको विषय श्रेष्ठले उल्लेख गरेकी छिन्। आफूहरूबीच सूर्य गुड्समार्फत नै वार्षिक एक सय वटा बीवाईडी गाडी बेच्ने र सात करोड रुपैयाँ नाफा कमाउने उद्देश्यसहितको सहमति भएको तर त्यसरी काम नहुँदा घाटा भएको श्रेष्ठले उल्लेख गरेकी छिन्।

त्यसरी मुद्दामा जाँदासम्मको समयलाई हिसाब गरेर उनले ४ वर्ष ६ महिनाको ३१ करोड ५० लाख रुपैयाँ पण्डितकै कारण घाटा भएको बताएकी छिन्। त्यसका लागि उक्त रकम र त्यही बराबरको क्षतिपूर्ति पण्डितले तिर्नुपर्ने श्रेष्ठको माग छ। पण्डितकै कारण सूर्य गुड्स कम्पनी नै निस्क्रिय र धरासायी भएको आरोप श्रेष्ठको छ। 

पण्डितले ५० प्रतिशत सेयर लिएको र सोबापत कम्पनीलाई बुझाएको रकम पनि पण्डित आफैले नै खर्च गरेको दाबी श्रेष्ठले गरेकी छिन्। उनले कम्पनीको सम्पूर्ण अख्तियारी र जिम्मेवारी आफूलाई मात्र हुनुपर्ने माग गरेकी छिन्। 

दुई व्यवसायीले आफ्नो व्यावसायिक मर्यादा भुलेर एकअर्काबीच दुस्मनी साँधिरहेका छन्। अदालतले नै मेलमिलापका लागि दिएको समयमा समेत श्रेष्ठ र पण्डितले मेलमिलापमा नगएर एकअर्कालाई देखाइदिने भन्दै ‘इगो’ लिएर बसेका छन्। 

दुई कम्पनीबीचको लफडा छताछुल्ल भएसँगै यसले उपभोक्तामा दुविधा उत्पन्न गराएको छ। यही कारण नै हुन सक्छ बीवाईडी ब्रान्डले सर्भिस सेन्टरबाट राम्रो सर्भिस नदिने र निकै महँगोमा सर्भिस दिने काम साइमेक्स इंकले गरिरहेको छ।

आधिकारिक बिक्रेताको लफडा चलेकाले साइमेक्सको दाउ सवारी बिक्री गर्ने र नाफा कुम्ल्याउनेमा मात्र केन्द्रित भएकोजस्तो देखिएको छ। यसरी आफ्नो आधिकारिक बिक्रेताबारे मुद्दा मामिलाको स्थिति भइरहँदा बीवाईडी अटो इन्डस्ट्री कम्पनी लिमिटेडले पनि केही कदम चाल्नु पर्ने हो। 

हालसम्म सूर्य गुड्स सप्लायर्सका सञ्चालक यमुना श्रेष्ठ र विशाल पण्डितले एकअर्काविरुद्ध दायर गरेको मुद्दामा ४२ पटक पेशी चढिसकेको छ। दर्जनौँपटक हेर्न नभ्याइने र हेर्न नमिल्नेमा परेको सो मुद्दा उच्च अदालत पाटनमा विचाराधीन छ। 

करछली गरेको बीवाईडीका आयातकर्ताबीच दुष्टता : एकअर्काविरुद्ध मुद्दा हालेर पुगे अदालत

बीवाईडीमा साइमेक्स इंकको बदमासीबारे अन्य सामग्री पढ्न यहाँ क्लिक गर्नुहोस्