काठमाडौं- नेपाल वायुसेवा निगम (नेपाल एयरलाइन्स) ले आन्तरिक उडानमा दुईवटा ट्वीनअटर जहाज उडान गरिहेको छ। त्यसमध्ये एउटा ट्वीनअटर जहाज ग्राउन्डेड भएको ६ महिना पूरा भएको छ। एउटा ट्वीनअटर भने आवर सेभको नीतिमा उडान भइरहेको छ। 

जेठ २३ गतेदेखि ग्राउन्डेड जहाजको दुईवटै इन्जिन फेर्न पर्ने भएको थियो भने आवर सेभको नीतिमा उडान भइरहेको अर्को जहाजको पनि एउटा इन्जिन फेर्नुपर्ने छ। इन्जिन अभावमा जहाज ग्राउन्डेड भएको ६ महिनापछि बल्ल निगम व्यवस्थापनले तीनवटा इन्जिन सट्टापट्टाका लागि कम्पनी छनोट गरेको छ।

निगम व्यवस्थापनले बेट शेमेश इन्जिन लिमिटेडको नाममा 'लेटर अर्फ अवार्ड' जारी गरेको छ। यो कम्पनी नेपाल प्रतिनिधि भने मर्करी बिजनेस इन्टरनेशनल हो।

निगमले कम्पनीसँग तीन वटा इन्जिन लिनका लागि 'लेटर अर्फ अवार्ड' जारी गरेको छ। निगमले उडान आवर सकिएको तीनवटा आफ्नो इन्जिन दिएर कम्पनीसँग तीनवटा ओभरहउल भएको इन्जिन लिने छ।

कम्पनीले निगमलाई ४ हजार घण्टा उडान गर्न मिल्ने इन्जिन दिएपछि निगमको इन्जिन लाने छ। कम्पनीले इन्जिन ६० दिनभित्र दिने प्रतिवद्धता गरेको छ। यसको अर्थ निगमको ट्वीनअटर जहाज थप दुई महिना ग्राउन्डेड हुने छ।

इन्जिन सट्टापट्टाका लागि अहिले छनोट भएको कम्पनीसँग कमिसनका लागि लामो समयदेखि निगम नेतृत्वले बार्गेनिङ गर्दै आएको छ।

तीन पटकसम्मको समय थपमा उही कम्पनीमात्रै सफल भएको र निगम कार्यकारी अध्यक्ष युवराज अधिकारी अन्तत: मूल्यांकन कमिटिका केही सदस्यले विरोध गरेपछि इन्जिन सट्टापट्टाका लागि बेटशेमेश इन्जिन लिमिटेड छनोट गर्न लागेका हुन्।