काठमाडौं- सन् २०२४ को ११ महिनामा १० लाख ५५ हजार ५ सय ३३ जना विदेशी पर्यटक नेपाल भ्रमणमा आएका छन्। गतवर्ष ११ महिनामा ९ लाख १८ हजार ३ सय ८ पर्यटक भित्रिएका थिए।
सन् २०२३ मा भन्दा सन् २०२४ मा १ लाख ३७ हजार २ सय ४५ पर्यटक बढी भित्रिएका छन्। गतवर्षभन्दा १३ प्रतिशतले पर्यटक आगमन बढेको छ।
सरकारले सन् २०२४ मा १२ लाख पर्यटक भित्र्याउने लक्ष्य राखेको छ। २०२४ को नोभेम्बर महिनामा मात्रै १ लाख १४ हजार ५ सय १ पर्यटक भित्रिएका छन्। सन् २०२३ मा नोभेम्बर महिनामा १ लाख ८ हजार ६ सय ३० पर्यटक नेपाल भित्रिएका थिए।
सन् २०२४ को नोभेम्बरमा नेपाल भ्रमणमा आएका पर्यटक २०१९ को भन्दा कम हो। २०१९ को अक्टोबरमा १ लाख ३० हजार ३ सय २ पर्यटक नेपाल भ्रमणमा आएका थिए। सन् २०२४ को नोभेम्बरमा सबैभन्दा बढी पर्यटक भारतबाट आएका छन्।
भारतबाट नोभेम्बरमा नेपाल भ्रमणमा आउनेको संख्या १९ हजार ९ सय १५ रहेको छ। यसैगरी अमेरिकाबाट १० हजार ९ सय ८१ र चीनबाट ९ हजार ४ सय ५८ जना नेपाल भ्रमणमा आएका छन्। यसैगरी बेलायतबाट ६ हजार ६ सय ११ र बंगलादेशबाट ५ हजार १ सय ४८ जना पर्यटक नेपाल भ्रमणमा आएका छन्।
