काठमाडौं- नेपाल क्रिकेट संघ (क्यान) को आयोजनामा मंसिर १५ गतेदेखि सुरु हुने नेपाल प्रिमियर लिग (एनपीएल)मा उत्कृष्ट हुने खेलाडीले ओमोडा/जेइको ब्रान्डको विद्युतीय कार पाउने भएका छन्।
सिद्धार्थ बैंक नेपाल प्रिमियर लिगमा उत्कृष्ट प्रदर्शन गर्ने नेपाली खेलाडीलाई शारडा समूहले विद्युतीय गाडी प्रदान गर्ने भएको हो। ओमोडा/जेइको एनपीएलको ‘ड्रिभन बाई’ सहप्रायोजक बनेको हो।
ओमोडा/जेइकोले क्यानद्वारा आयोजना हुने लागेको नेपाल प्रिमियर लिगको पहिलो संस्करणमा सहप्रायोजकको रूपमा साझेदारी गरेको हो। एनपीएलको व्यावसायिक अधिकार व्यवस्थापन गरिरहेको ब्रान्ड लजिक र क्यानको संयुक्त पहलमा मंगलबार सम्झौता भएको छ।
सम्झौतापत्रमा मंगलबार ब्रान्ड डिजिटल लजिक प्रालिका प्रमुख कार्यकारी अधिकृत रोशन निरौला र शारडा समूह अन्तर्गतको एसपीजी अटोमोबाइल्सका निर्देशक गौरव शारडाले हस्ताक्षर गरेका हुन्।
उक्त कार्यक्रममा नेपाल क्रिकेट संघका सचिव तथा नेपाली राष्ट्रिय क्रिकेट टोलीका पूर्वकप्तान पारस खड्का, क्यान र एनपीएलका सदस्यहरू, एसपीजी अटोमोबाइल्सका निर्देशक गौरव शारडा तथा अन्य व्यवस्थापकीय सदस्यहरूको उपस्थिति थियो।
नेपाल प्रिमियर लिगको पहिलो संस्करण एनपिएल २०२४ मंसिर १५ देखि पुस ६ गतेसम्म कीर्तिपुरस्थित क्रिकेट मैदानमा हुनेछ।
एसपीजी अटोमोबाइल्सका निर्देशक गौरव शारडाले ओमोडा एन्ड जेक्को र एनपीएलबीचको यो सहकार्यले नेपालमा क्रिकेटको प्रबद्र्धन र विकासका लागि टेवा पुर्याउने विश्वास व्यक्त गरे। उनले क्रिकेटको लागि लोकप्रियता तथा सफलता पाउँदै गरेको यो परिदृष्यमा खेल विकासका लक्ष्यहरू हासिल गर्न सहयोग पुग्ने बताए।
उत्कृष्ट खेलाडीले एसपीजी अटोमोबाइल्सले आमोडा/जेइकोको कार पाउने बताइएको छ। तर मोडल बारेमा आगामी दिनमा टुंगो लाग्ने क्यानका सचिव पारस खड्काले बताए।
एनपीएलको पहिलो संस्करणमा ८ टिमबीच प्रतिस्पर्धा हुनेछ।
