काठमाडौं- वैदेशिक रोजगारमा लैजाने भनी ठगी गरेको अभियोगमा तीन जनालाई प्रहरीले पक्राउ गरेको छ।
बिरूवा गाउँपालिका-१ स्याङ्जा घर भइ काठमाडौं महानगरपालिका-३१ बानेश्वर बस्ने ५० वर्षीया कमला कुमारी केसी, बडिगाड गाउँपालिका-९ बाग्लुङ घर भइ भक्तपुर सुर्यविनायक नगरपालिका-२ बालकोट बस्ने २२ वर्षीया सीता बुढा र मेचीनगर नगरपालिका-१० झापा घर भइ कामपा-२६ नयाँबसपार्क बस्ने २६ वर्षीय मनिश खड्कालाई पक्राउ गरिएको प्रहरीले जनाएको छ।
पक्राउ परेकामध्ये केसीले क्रोएसिया पठाइदिन्छु भन्दै चार जनाबाट आठ लाख २५ हजार रूपैयाँ, बुढाले बेलायत पठाइदिन्छु भन्दै एकजनाबाट दुई लाख रूपैयाँ र खड्काले क्रोएसिया पठाइदिन्छु भन्दै एकजनाबाट दुई लाख २५ हजार रूपैयाँ लिइ सम्पर्कविहीन भएको उजुरीका आधारमा प्रहरीले पक्राउ गरेको हो।
उनीहरूलाई आवश्यक अनुसन्धान तथा कारबाहीका लागि वैदेशिक रोजगार विभाग ताहाचल पठाइएको प्रहरीले जनाएको छ।
यसैबीच काठमाडौं महानगरपालिका-४ चप्पल कारखानास्थित एक घरमा जुवातास खेलिरहेको अभियोगमा आठ जनालाई गए राती प्रहरीले पक्राउ गरेको छ।
प्रहरीले उनीहरूको साथबाट नगद ७९ हजार चारसय ६५ रूपैयाँ र आठ बुक ताससमेत बरामद गरेको छ। रासस
