वीरगञ्ज- दिपावलीमा असावधानीवश पटका पड्काउने क्रममा बाराकाे कलैया उपमहानगरपालिकामा एक बालक घाइते भएका छन्।

आफ्नै घरअगाडि पटका पडकाउने क्रममा कलैया उपमहानगरपालिका वडा नं. १६ उत्तरझिटकैया टाेल निवासी सराेज साह कानुका १० वर्षीय छाेरा साजन कुमार साह घाइते भएका हुन्। साजन शुक्रबार बिहान १० बजे घाइते भएकाे स्थानीय केशव पटेलले जानकारी दिए। स्थानीय कन्तु यादवले पटका नपड्काऊ चाेटपटक लाग्छ भनि सम्झाउँदा पनि अटेरी गरेको उनले बताए।

बाल एकता बाेर्डिङ स्कुल कलैयामा अध्यनरत विद्यार्थी साजनकाे आँखामा पटकाकाे बारुद लागेकाे र आगाेकाे झिल्काले अनुहारकाे विभिन्न भागमा जलेकाे नेरा निमावि उत्तरझिटकैयाका व्यवस्थापन समिति सदस्यसमेत रहेका केशवले जानकारी दिए। अभिभावकले पनि पटका पड्काउने बालबालिकाकाे निगरानी नगर्दा यस्तो घटना हुन गएकाे पटेलकाे बुझाइ छ।

सरकारले प्रतिबन्ध लगाएकाे विष्फोटक पदार्थकाे स्थानीय बजारमा सहज उपलब्धता भएपछि बालबालिका अभिभावककाे आँखा छलेर पटका किनेर पड्काउन थालेकाे स्थानीयले बताएका छन्।

पटकाले निम्त्याउने दुर्घटनाबाट बालबालिकालाई सुरक्षित राख्न अभिभावकसहित समाजका सबै सचेत हुनुपर्ने देखिन्छ।