सप्तरी- यहाँको विष्णुपुर गाउँपालिका मलेकपुरस्थित सीता इँटा उद्योगमा काम गर्न ल्याइएका ४४ मजदूर अलपत्रमा परेका छन्। उनीहरू हाल राजविराज नगरपालिका-३ स्थित कल्टुपोखरी नजिकै निर्माणाधीन एक घरको भुइँमा बसेका छन्।
भारतको उत्तरप्रदेशस्थित सम्भल जिल्लाबाट १५ दिनअगाडि उनीहरूलाई ल्याइएको थियो। उनीहरूलाई ल्याउने ठेकेदार नै भागेपछि मजदूरहरू अलपत्र परेका हुन्।
भारतको उत्तरप्रदेश जिल्ला सम्भल थाना हजरनगरगढीका सोनु सागरले १२ दिन जसोतसो मलेकपुरस्थित सीता इँटा उद्योगमा बसे पनि ठेकेदार सम्पर्कमा नआएपछि अलपत्र परेको बताए। उनले भारतबाटै मो. जाकिर मियाँ नाम गरेको ठेकेदारले इँटा भट्टामा काम गर्न ल्याएको बताए।
सोही ठाउँका अर्का मजदूर बोहरा सिँहले इँटा उद्योगमा १२ दिन बसेको तर मालिकले खाना दिन छाडेपछि तीन दिनदेखि राजविराजमा भोकै बसेको बताए। 'हामीसँग पैसा छैन, घर जाने पैसा पनि छैन। कसरी घर फर्किने भन्ने चिन्ता छ', उनले भने।
जिल्ला प्रहरी कार्यालयले सीता इँटा उद्योगबाट ११ बालबालिका, १५ महिलासहित ४४ भारतीय मजदूरको उद्धार गरेको जनाएको छ। प्रहरीले उद्धार गरी सदरमुकाम राजविराज ल्याएपछि इँटा व्यवसायीले खाना खुवाइरहेका छन्।
सप्तरीका प्रहरी उपरीक्षक ढकेन्द्र खतिवडाले मजदूरहरू ल्याउने फरार ठेकेदारको खोजी भइरहेको र उनीहरूलाई भारत पठाउने प्रयाससमेत भइरहेको जानकारी दिए। रासस
